Tuatua Na Putaura (Taking the Idol of Pukapuka)

Iuni 16 1862¹

Kua tae mai te pai orometua ki Rarotonga nei i tau ra rai kua akaruke matoue i Rarotonga kua aere te pai ki Aitutaki aere atura matou tapae atura matou ki Aitutaki 17e tae ua atu ki te ra 19 akaruke maira matou i Aitutaki aere atura to matou pai ki Mangarongaro e tae akera ki te ra 30 kua tapae matou ki Mangarongaro i te oire ko Omoka kua aka putuputu mai te au taeake ki Omoka kua kitea te tai pekapeka ki reira e kua aka kore ia taua pekapeka ra. Kua apai ra matou ia Tearae e te raine² ki runga i te pai aere atura to matou pai ki Manihiki. I te maramo ia Iurai aere atura matou e kua tae matou ki Manihiki i te ra 6 e kua tapae atura matou ki te oire o Aporo i Tauuna e kua uipaia mai te ekaretia e te tamariki ki roto i te are pure e ra rekareka e te mataora tau ra ra aere atura to matou pai ki Rakaanga i te ora 6 i te aiai e tapae atura ki iuto i te popongi i te aere o Tairi e rua naka i tae mai ki runga i te pai e tiki i te orometua ia Oiri-rua aere atura matou ki iuto e kua uipa mai te ekaretia ki roto i te are pure kua aka maroiroi i te ararei anga mai i te orometua e ra rekareka e te mataora taua ra ra akaruke atura matou i Rakaanga i te ra 7 ia Iurai aere atura to matou pai ki Pukapuka³ aere atura matou e tae akera ki te ra 11 kua tapae atura matou ki Pukapuka i te oro 1 i kake ai matou ki iuta okotai naka i tae mai ki te pai ei tiki i te orometua aere atura matou na runga i reira ki iuto. Kua ararei atura matou ko Oiri-rua i nga taeake ia Ngati Moari e te raine ia okotai e te raine kua aere maira te oire i rotopu kia maua ma te orometua ma to ratou tu etene e rai tei te tu etene kua akataka a Oiri-rua i te tai papaki tangata i kite i te tatau i te tuatua na te Atua ka tuku ei ekaresia kua kitea e 60 tei taka kua ui atura au i reira ki nga taeake rare angaanga teiea to ratou Itoro kua aka kite maira raua te aka morinei rai te tangata kua tuatua atura au kia ratou e namua te rare i te Itoro ei reira ka akatupu ei te ekaresia kua akatika maira a Oiri-rua i reira kua ui atura au ki nga taeake teiea te rairanga i tau Itoro kua arataki maira a Ngati Moari iaku ki te ngai Atea e kua aka kite mai i te rairanga o taua Itoro ra kua aere atura au e apai i taua Itoro ra kua aere maira te tangata e manganui kua tuatua maira auraka e aere ka mate koe kua kapiki maira te taipae e aere tapaepae koe kite atura au i te ngai i tu ei taua Itoro ra aere atura au mate ekoko kore kia mou ra toku rima ki taua Itoro ra kua pukara io ra te tangata e manganui e kua kotikoti io ra te taipae ia ratou kite toki i to ratou kopapa apai akere au i taua Itoro ra ki runga i toku ua kua aka meitaki atura au ia Iekona koia i tuku mai i taua enemi ra ki toku rima aere atura tuku atura ki mua i te aroaro o te orometua o Oiri-rua kua tatora akera au i te au moenga i takai ia ai tau Itoro ra kitea iora e toka kua tuatua maira a Oiri-rua e aao koe i tena apinga ki te pute e kua aere maira nga taeake e kotai raine kua atuatu maira nga moenga ko tei kino kua tauna ia ia ki te ai e popongi akera i te Sapati ko te itinga mai ia o te marama ki runga ia Pukapuka e ra mataora taua ra ra aere atura to matou pai ki Niue.