Other formats

    TEI XML file   ePub eBook file  

Connect

    mail icontwitter iconBlogspot iconrss icon

Ko Nga Moteatea, Me Nga Hakirara O Nga Maori

HE TANGI NA TE KORIRI

page 264

HE TANGI NA TE KORIRI.

Nei ka noho, ka hewa ano ra,
Te whakakikitanga i te kapu o te ringa,
No reira ano, ka puta mai ki waho,
Haere rua te tai ki Oaoiti;
Whano ka whakatata ki te hanga i te matau,
Nona te manapou te ora,
Koia Onekai i runga,
He manapou te ora,
Koia Onekai i raro,
Kaore ka tikokotia, e te tai,
Kaore ka popoko.
He mata tangata, i taia ki te turiwhati,
Tukiwhakarere,
Ka patupatu koe i to mounu,
Hakikino, hakirere,
Nona te mounu a Haki,
I kai whakatupua,
I kai whakatawhito,
Kia whakatina koe i to matau,
Tina te hohou, tina te taka, tina te takerekere.
Ekore e ngaro o hinonga, ki te whakakeko i te ngaki kia
papai,
I te patua i runga i te takere.
He oti ano te tango i a au,
Ko te ao rere mai i runga i Otahu.

He tapuwae haruru te hekenga i Titipou,
Toia atu ra te waka, tapatu ki te moana,
Mei whaia koe ki te mata taumanu,
Whakamau atu i to matau, ki te papahu i tai ra,
E hui, e hui rangi;
Whakamau atu i to matau ki te ninihi i tai ra,

page 265

E hui, e hui rangi,
He aha ra te pohutu mai nei,
He tutumairekurai;
He taniwha ra te karapu mai nei,
He tutumairekurai;
Ka mate tonu te ika ki te urunga,
He tutumairekurai;
Ka eke tonu te ika ki te moenga,
He tutumairekurai.

I haere tatou i te moaniani,
Ka tae ki waho,
Ka tutakina, e hukatu, e hukarere,
Ka hoki au i runga Rangitako,
Ko te waka tena no aiorangi,
Haere i te aio,
Ka takiri te ata, ka hopu to ringa,
Rangihutia, Rangiheitia,
Hei taenga mou, ki te tahuna tapu,
Hapaipai te kiato mua, ka mania, ka paheke,
Hapaipai te kiato roto, ka mania, ka paheke,
Heke i Ururangi,
Kapohia ana ki to whakataunga,
He aha tau e tawhiri mai na,
Ko wai kia whanatu i toku wehiwehi,
Tena, takahi iho, kei whea he turanga,
Me aha he whakau; e,
Kia tahuri ki uta, ki to haukainga,
I matakarapa taku tirohanga
Ko to tinana tenei ka ora mai.