page 36

HE TANGI, NA MAKERE, MO ANA TAMARIKI I MATE TAUA.

E hine, a Ki, e
Ka moenga ke koe,
Ka pau te takiri, ki te ata kahurangi,
Roto te whare nui, kei a hine a Wai, i-e
Mana, e tuku iho,
Ki te takapau hora nui.

Rangona te kakara,
Te kakara wahine, i te ipo a ’Ti-Hine;
Ehara ano, i te tangata.
Na Huinga ano,
Na Mahara ano,
Na Te Hikonga-a-rangi ano,
Nana, korua koi, tohatoha marire iho,
Mo te umu o te hau, e.

Tenei te tangata, ko taringa puta iti,
Ekore e whakarongo mai, ki te korero;

Kaore o te ao nei tangata, hei ngaki kai, i nga tu,
Tena nga hua-tarau o Tane, hei ngaki i to mate,
Hei kawe i a au, te rae ki Okawa,
Kia naomia mai, te ate o te whenua.
Aua, ko te tangata, me patu marire.

Me mahara marire iho, ki roto Wharekura, ki nga whare
punanga korero,
I pu ai, te riri, e-i
Taku kotuku moe awa;
Taku tumu herenga-waka;
Mana i okooko,
Te aka whero, o te whenua.
Ka rangona koe, ko Otahu.

page 37

Te wehi, o te whenua; e
He kawau topatopa, ki roto te Manga-iti;
He Takupu horo ika, e.

Hakahaka, koa ra,
Hikawera e tu mai ra, i
Mea, ka ngaro noa, te rua o Kaiwhare.

E tama ma nei,
Karihitia mai, e koe, ki te wai o te niho,
Ekore e tupu te kawa tangata, ki te ao marama
Ekore e ngaro; he puia taro nui, ngata taniwha, rau,
He aua matawhero,
Hei ika moe kopua,
No roto i Werohia.

Tenei te hoanga,
Te takoto i raro nei,
Waiho, kia oroia,
He whati toki nui.

Haere ai koe, i te ara titaha;
Haere ai koe, i te ara kohuru;
Kupenga taratara, i whakahaoa iho i,
Paenga paraua, ki roto te Hikumutu.

Taku ika topuni, ka moe ki reira na i,
Hou o Rakei, i whakahaerea iho i;
Kiri o Rongomai, ka pau te whakarato,
Ki te ahi kai rikiriki e-i,
Ko wai ra e? te Atua mana o te rangi,
Me ko Uenuku ra, he Atua kai tangata, Ianei, i-i.