Ko Nga Moteatea, Me Nga Hakirara O Nga Maori
HE TANGI, NA TAMAKU
HE TANGI, NA TAMAKU.
Taku whakatakariri,
Taku whanowhanoa;
Kia tu tahi, koia e ora roa,
Te tangata i te mahara,
Taipari, whiuwhiu korero ki Waikato ra, e,
Ki a Te Waharoa ra.
E ahu ra uta ki te whare kai kino, ki a Huka ra, e,
Hoki ke mai nei,
Ki te paki no Ruhi i horahia ra hoki,
Moe ware i te hau,
Ko Te Haupapa, me ko Te Ngahuru, e,
Te puhi o Te Arawa,
No reira e te hoa,
I huripokina ai,
Koutou ko au tamariki,
Taku waka whakarei,
Tena ka paea ki roto te Houhou,
Ma te ika warehou,
Ma Tarakawa, te kai ma Te Heru,
Ma Te Riuwaka ra,
Ma Koroiti tana angaanga;
Ki roto te koihua i.