page 225

HE WAIATA TAMARIKI.

Tera Meremere,
Ka mahuta i te pae, ko Tuhau ki runga, ko,
Manaia pea kei whakaahurutia, e au e,
Taonga tuku atu ki te anuanu, te hoki mai, e-i,
Tenei to waka, ko te Harakeke.
Na Whanui e,
Whakau ana tama i te pae,
Kei Hawaiki e,
Kore koe, tangihia, mei riro ana,
Mo Kotua.
Tangaroa i te horomea,
I tukitukia ai koe,
I taitaia ai,
Nga haupapa kohatu, i waho o Totorewa,
Kia mihi, au e,
Hoki mai e tama, kia tarunatia koe,
Te whatu o Poutini,
Te waero i te whare kei a Te Ruru,
A Te Hautawaho,
Ko wai ra te awa o to waka,
I haere ai koe,
Te awa i Mahae,
Ko te ara no Tu,
Iri ana taku ringa te tau o Matangi,
Kei a Te Kiri,
A Te Awhi,
Huna iho ra ki te hopara nui,
Na Toi,
Ka patua, te kakara nga matarae,
I waho o Titohea e,
E Riki taku hoa, pona ia iho,
To tamaiti e,
Aha te whakama no namata te ika tere,
A Mahina,
Ka paea ki te one kei te akau roa,
I Mawhiti na-i.