KO TE TANGI, A TUROA MO TE KOTUKU.

Kaore te aroha, e Whai i a au
E whanake tonu nei,
Na te pupuke i ahu ka hua te mahara,
Ka hua te wananga,
Ko Houtupu,
Ko Houora, ka noho i a Te Atea,
Ka puta ki waho ko te Po,
Te Po-i-tuturi,
Te Po-i-pepeke,
Te Po-i-oti-atu,
Oti atu koutou ki te po, e-i,
Na te kore i ai,
Te Kore-te-whiwhia,
Te Kore-te-rawea,
Kia rongo mai te tohunga
Kia whakapeka mai, ka he hoki au
No Wharekura ano,
Ka noho te Ranginui e tu nei,
Ka noho i a Te Atatuhi

page 153

Ka puta ki waho,
Ko te marama;
Ka noho i a te Werowero,
Ka puta ki waho ko te ra,
E haere puku ana,
Ka huakina ki runga, hei kanohi mo te rangi;
Ka marama koutou te haere,
Ki te kawe a riri.
Tahuri mai o mata ki muri ra,
Te ata ka haea i runga o Tongariro,
He ata kai taua,
He ata kai tangata, e-i
I whai pea koe, ki nga tahua a Ngatoroirangi,
Ko Ihumotokia,
Te Moanawaipu,
Awatea ake ko Taraiwhenuakura,
Ko te Kohuwai, ka whakamutu te riri.
Moe mai e Pa, i roto Matangirei,
Ko te whare o Turi i u ai ki uta,
I hui katoa ano nga tauiwi nei ki roto,
Taria e tukituki ki roto Kaikapo;
Mo Whakapapatuakura,
Mo Matawhare-te-uia,
Ka mau te pakanga, e-i
E tika ana koe i te ara kai riri i runga Turangarere,
Mo Te Rangihauora,
Mo te tautara tu,
Ki Turangamaea,
Ko Te Kohutu, e
Whakahokia mai ki roto Patea,
Mo Te Rakauhakahaka,
Mo Haututerangi,
E Kahu i te raki, tena to iramutu
Rahiritia mai,
Waowhia mai ra ki te kete putuputu na Raukatauri,

page 154

I takina ai Kae,
Ka mate.
Huna mai ra ki roto Harururoa,
Ko te kokori a Paekawa, i takoto ai Hunakiko;
I takoto ai,
Ko Manawa, e-i
Koi aha ai koe te hunuhunu ai ki te mura o te ahi,
Ki titiro iho koe, te kiri o Manumea,
Ka whara kei muri,
Kia hua i roto ra,
Kia whakaringaringa,
Kia whakawaewae,
Ka whakakanohi i a koe;
E tama taringa kore, te rongo mai ai,
Ka pau te hora e au ki a Tahu,
Ka pau te tuitui ki nga kakahu o Hau,
He mea mahue au, i te unuhanga heke,
He papa makere au, i roto te Kopae-pararakite-uru,
Ko te whare o Tane.