Ko Nga Moteatea, Me Nga Hakirara O Nga Maori
KO TE WAIATA, A RANGIOMANOA, MO WHAKAUPUTA
KO TE WAIATA, A RANGIOMANOA, MO WHAKAUPUTA.
Kaore taku raru te mohiotia!
Te tangi a taku ihu,
E whakapaheke nei:
Te wai i aku kamo,
Ko te rere-tangi mai,
Whiua ki te rae
O te Pihanga i runga;
Ko te rimu mau toka,
Ko te rite i aku ’nohi,
E whakapaea ana
Ki te one i Rangatira.
Kei tito, e roto
Te ngakau hokirua.
Te tumanako atu,
Ki a Te Whaka,
I wehia.
E au mahara kore,
Ki te miri kau atu,
He makautangata;
Naku rawa i whakakainga nui,
Katahi nei ka tukua,
Kia mahia e te tini,
Hei paki a whare.
Whakaaro
Rawa iho
Tenei ka eke nei,
Te puke kei Ruahine.
He pakaru a waka, e taea te raupine mai.
Ka tuku au e, ki taku matua mate,
E whakaririkatia iho e au ki te po,
Tuakoi rawa,
Kei taku taha maui,
Poupourere ake ka hewa au,
Ki te ao.