Iniraiti—(Indict).

He kupu tenei mo te tuhituhi pukapuka whakapae Hara ki tetahi tangata, ki etahi tangata ranei. Ko te ingoa o te pukapuka, he Iniraimene. Ka. tuhia te pukapuka whakapae, ka hoatu ki tetahi Runanga, i whakaritea hei whakarongo, hei titiro i nga korero o te whakapaenga, hei mea hoki. e whai take ana ranei, kahore ranei. Na, ki te mea ratou, e whai take ana, ka tukua kia whakawakia; ki te mea ratou, kahore i whai take, na, kahore hoki e whakawakia. Te ingoa o taua Runanga, he Huuri ano, ko te Huuri-nui. Haunga ra tetahi Huuri, te Runanga-Huuri te kau ma rua nei. Na, ma tenei Huuri e whakaae te pukapuka Iniraimene, e whakakahore ranei. Tetahi ingoa mo taua pupapuka, he Pire-Iniraimene. Ki te whakaaetia, ka tuhia e ratou ki tua o te Pire, "He Pire pono;" ki te whakakahoretia, ka tuhia e ratou, "Kahore i kitea te pono" He mea whakaoati ano tenei Huuri, kia pono ta ratou mahi. He mea Iniraiti nga Hara-Kirimina katoa e meatia ana ma te Kooti Hupirimi e whakawa.

Utu-Whaine—(Fine).

He kupu tenei, te Whaine, mo te moni e whakaritea ana e te Ture kia hoatu e te tangata kua mea i te Hara-Kirimina. Ko te nui o te moni, he mea whakarite e te Kai-whakarite-whakawa, he mea ata whakarite ki te nui o te Hara; ko te Hara nui, ko te utu nui; ko te Hara iti, ko te utu iti; tetahi hoki, he mea whakarite tetahi wahi ki te tu o te tangata i meinga kia utu; ekore e tino peratia te Whaine, i te tangata rawakore, i te tangata whai-rawa. Kei etahi Hara, he mea ata whakarite e te Tare ano, he mea penei hoki, kei neke ake i te mea, te Utu-Whaine, a kei neke iho i te mea; na, ka waiho ma te Kai-whakarite-whakawa te tikanga, mana e whakarite i roto i aua rohe.

Ko nga Utu-Whaine ka hoatu ki te Kooti-whakawa, hei moni ma te Kuini; he mea ano e ahei ana te wahi ma te Kai kawe ki te whakawa tetahi taha, ma te Kai whakaatu ranei: kei te Kai-whakarite-whakawa ia te tikanga. Na, ko te tangata Hara i meinga ra kia utu, ka kiia, kua Whainetia. Tirohia te Korero Timatanga hoki, § 43, ki etahi atu korero mo tenei mea, mo te Whaine.