[ko te tohutoro i roto i te reo Pākehā]

§ 4.

He tini nga ture a te Pakeha, a kore e taea te mahara e te iwi katoa; na reira e whakaritea ai e Te Kuini, e Te Kawana hoki, etahi tangata, mana ake taua mahi te whakaakoako i a ratou ano, te whakahaere hoki i aua Ture ki te iwi. Koia nei nga Kai-whakarite-whakawa. Ma te Kawana e titiro nga tangata manawanui, whakaaro tika, mohio hoki, ka whakaturia e ia kei Kai-whakarite-whakawa. Ka whaka-oatitia ratou kia waiho i runga i te tika anake a ratou whakaritenga, kia waiho hoki i runga i ta te Ture i whakatakoto ai hei tikanga mo ia mea, mo ia mea. Ko nga tautehetohe me kawe atu ki a ratou, ma ratou e whakarite. To ratou mohiotanga, no nga pukapoka e takoto nei te tuhituhi nga tikanga o te Ture, he mea korero tonu hoki na ratou, he mea whakaaro nui hoki;—tetahi wahi o te mohiotanga no roto i ta ratou mahi; ka roa e mahi ana i taua mahi, ka tohunga te tangata, ka nui haere te mohiotanga; tetahi, he mea rapu e ratou nga whakaritenga a nga Kai-whakarite-whakawa o mua i ratou.