The Laws of England, Compiled and translated into the Māori language.
§ 31
[ko te tohutoro i roto i te reo Pākehā]
§ 31.
Takoto ke ana te tikanga a nga Iwi noho maori noa iho, kaore ano i maea ake i roto i te kuware, i te puhehe. Ta ratou, ma te tangata mate i te mahi he a tetahi, ma nga whanaung ranei o te tangata i patua, ma ratou tonu e whakawa te tangata hara, ma ratou tonu e whiu, e whakamate ranei, me he mea ka tika ki to ratou na whakaaro kia mate ia. He tikanga he rawa tenei, ta te mea hoki, he riri, he pouri kei o ratou ngakau, a ekore e ata tika te whakawa a te tangata i runga i te whakatakariri. Tetahi; ki te tukua ma ratou ano e whakapa te whiu ki te tangata hara, tena pea e kawea e te ngakau whakatakariri, ka whakanui rawa i te mamae. Tetahi; ka peratia, aianei ka rapu utu hoki nga whanaunga o te tangata hara ka whakamatea nei e ratou, a ka nui haere te kino.
Tetahi hoki i kore ai e tika kia waiho ma te tangata i te he e rapu utu mona, kei nui rawa pea te pouri, ka tino whakataimaha i te whiu; kei patipatia ranei e tera, homai ana tona taonga hei utu; aianei, ka tukua te tangata hara kia haere noa, ekore e ahatia. Ki te tikanga penei, haere kau ana te tangata whai-taonga, kaore tona hara e whiua.
Na konei te Ture i mea ai, kia whakaturia tetahi Apiha mo tenei mahi, a kia waiho tenei hei mahi tutaru mana, ko te whakatutuki i nga kianga iho a te Kai-whakarite-whakawa Tumuaki i puakina i runga i te whakawa; ko te whakapa hoki i te whiu e whakaritea ana mo te tangata hara. Me tangata ke ia, kauaka hei te tangata e tata ana ki te tangata mate, ki te tangata hara ranei; kei kawea e te pouri, whakanuia ana e ia te whiu; kei kawea ranei e te whakaaroha, kei patipatiria ranei, whakangawaritia ana. Te ingoa o tenei Apiha, ko te Heriwhi. Pai rawa tenei tikanga: ekore hoki e mauaharatia ta te Heriwhi; e mohiotia ana hoki, ehara i tana whakaaro ake, engari he whakarite kau tana i te kianga iho a te Ture.