The Laws of England, Compiled and translated into the Māori language.
§ 26.—Whakahaerenga Whakawa Hara-Kirimina
[ko te tohutoro i roto i te reo Pākehā]
§ 26.—Whakahaerenga Whakawa Hara-Kirimina.
Ko te tino mahi nui ma nga Kai-whakarite-whakawa o te Kooti Hupirimi, ko te whakawa i nga Hara nunui, Hara-Kirimina nei. Kia ata whakarongo mai ki tenei wahi, he mea nui hoki. Ki te mea kua meatia e tetahi tangata tetahi Hara-kirimina; na, me haere atu te tangata Pirihimana ranei, tangata ke ranei, i mohio ki taua meatanga, ki tetahi Kai-whakarite-whakawa, me korero katoa atu e ia ki taua Kai-whakarite-whakawa ana i mohio ai ki taua mea. Na, ka whakarongo te Kai-whakarite-whakawa, a, me he mea ki tana whakaaro iho e whai take ana hei peratanga, ka tukua e ia tana "Hamene-Kirimina," hei tiki, hei tono ki te tangata i meinga ra nana i mea taua hara, kia haere mai kia tu ki tona aroaro; a, me he hara nui, kino, (pera me te Whakamate-kohuru, Puremu-reipa, Tahu-whare, aha, aha;) ka tonoa e ia he Katipa-pirihimana ki te tiki, ki te arahi tonu mai. Kia tae ki te Whare-whakawa, ka whakarangona e te Kai-whakarite-whakawa nga korero a nga Kai-whaki katoa, a ki te mea tana whakaaro kua meatia e taua tangata te hara i whakapaea ki a ia, na, ka kiia iho e ia kia whiua. Me he hara nui, a, ki ta te Kai-whakarite-whakawa whakaaro e tika ana te korero mona hei take e whakawakia ai e te Kooti Hupirimi, na, ka meinga e ia kia kawea ki te Whareherehere, ki reira noho ai taea noatia tetahi ra nohoanga whakawa o taua Kooti.