5. Nga Pa Tuna O Ngati-raukawa Ki Ohau

Na Tamati Ranapiri

Nga pa tuna o toku takiwa nei he papa tutaki te nuinga; he awa ririki noa iho nga awa, he pou tahi tonu kua tu te kupenga, kua heke te tuna. Otira kei nga iwi mahi pa tuna o nga awa nunui ko ratou pea e mohio ana ki nga ingoa katoa o te pa tuna. Ko nga pa nunui, whai tikanga, e mahia ana e nga tohunga mahi o tera mea o te pa tuna ka poua te pou tuatahi kite taha katau o te ngutu o te pa; te ingoa o taua pou he pou reinga; ka whakanohoia te mauri ki taua pou.

Na, mo te hekenga o nga tuna i te po tuatahi, tuarua, maha atu ranei, e kore e patua te tuna o te po tuatahi, tuarua, tuatoru ranei, kia mutu ra ano te heke a te tuna katahi ano ka mate te tuna. Ki te patua te tuna i aua po mutu tonu atu te heke a te tuna, ahakoa nui te wai.

E kite ana ahua e tunua nuitia te tuna ma nga tangata, wahine, tamariki, a e wehea ana te tahua ma nga tane, he tahua ano ma nga wahine me nga tamariki.