Fishing Methods and Devices of the Maori
4. Nga Mahi Patu Tuna O Nehera —
4. Nga Mahi Patu Tuna O Nehera
Te mahinga i te pa tuna he penei V kia kaua e kaha te taheke, kia aungawari; ma nga pakau ra e whakakaha te eia. Ma nga tohunga anake e whakarite he wahi tika hei tunga mo te pa tuna. Ka kiia nga pakau e rua he pa tauremu.
Te mahinga o te pa tuna i te tuatahi ko te poupou haere i etahi manuka kaha hei pou. Ko te tawhitiwhiti o nga pou i tetahi ki tetahi 1½ putu, ara kei te ahua o nga takaka manuka (1) te ahua o te ruri o nga pou ka whiri ai. Hei nga awa nunui noho ai e rua, e toru nga ngutu o te pa. E rua nga pou tino kaha rawa kei te pito o te pa tau-remu(2). Ko nga kurupae i muri o te pou hei whakau i te pou koi hinga i te kaha o te eia, i te nui rawa ranei o te tuna i roto i nga hinaki(3).
I raro i te ngutu nui o raro o nga pakau e rua me whariki i te takaka, kia piri tonu te takahi i te kaupapa o te wai, ko hoatu ai he kurupae ki runga i nga takaka i takahia ra, ki reira takoto ai; hei pupuri tonu taua rakau ra i nga ngutu o nga rohe(4). Ko te rohe he kupenga nui, e pau ana te mano tuna ki roto i te wa kotahi i nga po e haere ana te tuna(5). He roau ano kei runga ake i nga whaka-whirinaki e kurupae ana.
Ki te wha nga ngutu o te pa tuna kotahi, kia tokowha ano nga tangata mohio hei tukutuku haere mai i runga ake i te waenganui o nga pakau o te takiwa o runga, ka tukutuku haere mai, ka tae ki te takiwa o te ngutu o te pa pehi ai ia tangata, ia tangata i tana rohe, i tana rohe. Ka pehi iho i te taha o raro o te rohe, kia mau ai nga whiti ki raro i te kurupae o raro, me nga whiti hoki ki te kurupae o runga. Kia tupato koi hurirapa te rohe o tena, o tena.
page 233Kia kotahi haora [hour] i muri mai o tenei ka haere ano te kaititiro me he mea kei te pai nga rohe, ki te kore he rakau, he para rakau, koi whakakiia i mua o nga ngutu o nga rohe. Kaore i tino roa rawa ka haere ia ki raro whawha haere ai i raro o te rohe i te mania o te kiri o te tuna. Me ha mea kotahi maro te kiinga o te rohe i te tuna, ka herea te taha o runga ake o nga tuna ki te harakeke, ka wetewete i nga here o te tou o te rohe, ka uta ai i runga i te pokohiwi o ia tangata, o ia tangata nana nei te rohe, ka riringi i nga tuna ki roto i nga hao, i nga kete, i nga rahu. Ka tuku ai ano i nga rohe kia rere ana, herea nga tou, wetekina nga harakeke i herea ra i te tuatahi.
Kotahi tetahi kaumatua, ko Matiu Repenga, e ora ana i Omaru-mutu i naia nei, no te Whakatohea taua tangata; i kitea e ia i mua kotahi te po e mea mano tuna e mate ana i te po kotahi i Waiaua, i Otara, e tata atu ana ki Opotiki.
Ko te wa hei patunga i te matamoe hei te takiwa o te ngahuru, hei te waipuke tuatahi o Maehe, o Aperira ranei. Kaore e pokanoa te haere o nga papawhenua i te haerenga tuatahi o nga matamoe. Ko te papawhenua ko nga ika nunui tenei, koia te whakamutunga ki te rere. Ka haere te papawhenua he tohu tera ka mutu te rere o te ika o taua tau. E wha nga momo matamoe:—
1. | He rara. He ika ririki. |
2. | He oue. Ahua rarahi ake. |
3. | He aopori. Ahua rarahi ake. |
4. | He papawhenua. Ko nga mea nunui. |
Na, ko nga momo tuna:—
1. | He matamoe. |
2. | He kaiherehere; he pango te tuara, he ma a raro o te puku. |
3. | He tapa-harakeke; he whero a runga o te tawaka o te tuara. |
4. | He ngehe; he tuna repo. |
5. | He kukahika, he horowai tetehi o ona ingoa; he tuna e noho ana i ro wai tai, maori hoki. |
6. | He piharau, ara he tuna korokoro. |
Mehemea kaore he pa he tuku noa iho, me tuku te hinaki ki nga kopua taita ranei, me hoatu he mounu. Ko nga pa hoki i mahia ai mo te wa anake o te ngahuru, e mohiotia ai nga tuna e haere whaka-raro ana ki te moana ki te whakawhanau.
Ko nga hinaki o tenei takiwa te roa kotahi maro me te hau; i hangaia ki te manuka pakupaku, he tari te ingoa o enei tu manuka.
Ko te waharua, ehara i te mea mo nga pa tenei tu hinaki te waharua, engari mo nga awa nunui, ka hoatu ai he mounu ki roto. Te ingoa o te wahi o te hinaki hei tomokanga atu mo te tuna, he akura.
page 2341 He rarauhe te takaka, he rauwiri manuka mo nga pa nunui o nga awa nunui, he takaka rarauhe mo nga awa pakupaku hei pa.
2 Nga ingoa o aua pou e rua he tapangutu. Kei raro i te wai he paepae, he urunga, he paepae to runga hei whakamau i nga pa ngutu [?tapangutu].
3 Ko nga kurupae hei whakau. Ae, he tokai te ingoa o ena.
4 Na nga whariki manuka i raro i te takere o te awa, i raro i te paepae o nga ngutu o nga pakau i whakakaha te eia o te awa, kia kore ai nga tuna e ahei te piki whakarunga ake.
5 Mo te rohe; he manuka, he pirita nga whiti. He mea roa te rohe, a e rua maro te whanui. Ko te rohe hei taki mai i nga tuna ki te tino hinaki nui. Ko taua rohe, ko te wahanga o runga i tino tatahi nga mata, ara te waha. Te whanga tuatahi he potaka, te whanga tuarua he pararakau, te whanga tuatoru he tatao, te whanga tuawha he kupenga-a-kai, te whanga tuarima he pu hinaki, te whanga tuaono te tino hinaki.