Other formats

    TEI XML file   ePub eBook file  

Connect

    mail icontwitter iconBlogspot iconrss icon

Fishing Methods and Devices of the Maori

16. Mahinga Patiki —

16. Mahinga Patiki

Ko te ritenga o te mahinga o tenei ika o te patiki i roto i te wai maori i nga awa, i nga hapua, me whakamarama te mahinga o taua ika i te hapua o Waihora. Kei te mahi tonu tenei hapua i te patiki i nga marama katoa, tae noa ki te tau, e rauia ana ki te kupenga i tena marama, i tena marama. Hei te taenga ki te Matahi, kei tera marama he mohoao te patiki, ko te patiki momona tera o Waihora. Ko taua tu patiki nui atu te hiahia o te Maori ki te mahi. Katahi ano ka tukuna nga kupenga nunui ki roto i te wai hei hao mai i aua patiki mohoao; ko te nui ano ia o te patiki, he raututu, e [he] whaiwhai, ko etahi ingoa enei o te patiki. Ka mate mai nga patiki ka tuatuakina nga piro, ka kotikotia nga upoko, ka mutu ka whakairiiritia ki runga i nga whata taurangi ai kia maroke ai. E pena katoa nga ritenga a te Maori, puta noa te motu o te Waipounamu.

Me whakamarama hoki tetahi ritenga, ki te mea ka pakaru atu te wai o Waihora ki te moana nui, akuanei nga patiki mohoao nei tae rawa ki nga awa, ki nga wahi e mahia ana e nga Maori o era atu kainga, pa ranei. Ka mohio mai nga tangata o Te Umukaha [Temuka] o Waihao o Moeraki, o Waikouaiti, o Otakou, o era atu awa e uru atu ana te patiki; kua mohio tonu mai nga tangata o nga kainga tawhiti kua pakaru a Waihora, notemea ko taua ika ko te patiki mohoao no Waihora anake. Kei te Toru ka mutu taua patiki mohoao, ka tuturu tonu ko nga raututu me nga whaiwhai, tae noa ki te tau e mahi ana, na reira te whakatauki mo tenei moana mo Waihora, koia tenei. "Ko nga hau ki etahi wahi, ko nga kai ki Orariki." Me whakamarama te ritenga o tenei whakatauki, koia tenei; he nui ano te kai o etahi whenua, e mahia te ika me era atu kai a te Maori i roto i etahi marama. E kore e tae rawa ki te tau e mahi ana, e kore e mah i tena marama, i tena marama, engari kei nga marama ano e mahi ai. Tena ko Waihora he mahi tonu tena marama, tena marama, tae noa ki te tau. Ehara i te mea he patiki anake, engari he tuna me era atu ika, he aua me etahi atu kei te wa e tuhera ai te ngutuawao page 246Waihora. Kotahi pea tau nui atu te ika o te moana e tere ana mai ki roto, puni rawa ake te ngutuawa, kua mau tonu te nui o nga ika ki roto ki Waihora. Ka rawe koe nga mahi a te kupenga i tena wa.