15. Mahinga Inanga

Na Ngai-Tahu

Ko te mahinga o te inanga; ka timata i te ngahuru te rere mai o te inanga tuatahi; e kiia ana e te Maori tera inanga he pukoaere. E whakaekea ana i roto i nga awa, he mea keri marie ki te awa no mua mai e nga Maori. Ka tukuna mai te wai ma roto i aua awa, tae rawa ake ki nga wa e heke ai te inanga. Ka tere atu ma roto i nga awa i keria ra, ka whakapunia mai ki te kaka, he mea ata hanga maria te wahi he hopunga mo nga inanga. Hei [te] ata awatea ka whaka-kototia nga kaka; hei te awatea, kia tikei maro mai te ra; ka takiritia nga kaka kua ki a roto i te inanga, ka horahoratia ki runga ki nga papaki, ki nga tienga ranei. He mea ata raranga marie e nga wahine aua papaki hei whariki mo te horahoratanga o nga inanga. Neke atu pea i te whitu nga ra e horahora ana, ka whaoina ki roto i nga kete, ka hoatu ki runga ki nga kaupapa. Kotahi marama e rere ana te inanga tuatahi ka mutu, ka timata he matuaiwi te inanga tuarua; katahi ka tu nui te heke mai o te inanga i tenei wa. Ka heke ano te inanga i roto i nga awa keri me nga awa tawhito ano o mua iho. Ka nui te tangata ki te mahi i tenei ika i te inanga i ta ia hapu wahi mahinga, i ta ia hapu wahi mahinga. E whakapunia ana nga wahi hei maunga mo nga inanga. Ki te mea he awa nui he mea ata mahi marie e te tangata maori nga wahi hei hopunga mo nga inanga. Ka nui ki te mate i roto i nga kaka; ka horahoratia kia maroke. Kei nga hapu kaore e hiahia ki horahoratia a ratou inanga ki runga i nga papaki harakeke ka horahoratia ki te whenua noa iho, ki runga hoki ki nga whatu taha patiti [?]; kaore e pirangi ki te papaki harakeke koi kawa nga inanga. Ka hiahia ki te kai hou i te inanga ka taona ki te umu, ka maoa, ka kainga. Ka matu te horahora, kia maroke ka page 245taona etahi ki te umu, nga mea ano e pirangitia ana kia taona. Ko etahi ka waiho tonu kia maroke ana i roto i nga kete, ka whakaekea ki runga i nga whata mo tena tau, mo tena tau. Pena tonu, ahakoa kaihaukaitia atu ki era hapu ka poia atu, ka tae, ka whakaekea ano ki runga ki nga whata.

E toru nga mahinga inanga i roto i te tau kotahi, e toru hoki marama, ko Aperira, ko Mei, ko Hune, ka mutu; e mahia ana tenei ika i te awatea.