14. Mahinga Hao (Tuna)

Na Ngai-Tahu

Ka timata te mahi o tenei ika o te hao i te ngahuru, i te marama o Hanueri; ko taua marama te timatanga mai o te ngahuru ki te Maori, a tae noa ki te marama o Aperira, he ngahuru katoa enei marama ki te Maori. Kei te marama o Mei ka timata atu te tatau a te Maori, he Matahi, he Maruaroa, he Toru, he Wha, he Rima, he Ono, he Whitu, he Waru, he Iwa, he Ngahuru. Ka tae atu hoki ki a Hanueri he ngahuru tena. Kei taua marama e kiia nei e te Maori he Matahi ko ta te Maori tau hou tera, ka timata atu te tau hou.

Kei roto i nga re [? rei, repo] nunui te nohoanga o tera ika o te hao, he tuna ano taua ika te hao, engari he mea ahua ririki marie; ko te ahua ia he tuna ano. Kia puta mai he ua nui ka mohio nga tangata mahi pera akuanei te heke ai te hao. Ka haere atu ki o page 244ratou pa mahinga hao, rauiri nei, whakatu ai i nga hinaki, ao rawa ake te ra kua ki; he wa ano e rua, e toru nga kinga o nga hinaki i te po kotahi. Kei te noho tonu nga kaitiaki i reira titiro i te po i nga wa e nui ana te heke mai o taua ika. Ka maua mai, ka whaka-maroketia etahi, ko etahi ka tahuna. He ahi nui noa atu, kia ngarehu rawa taua ahi, aua ahi ranei, ka raraina nga hao. He mea ata mahi marie e te Maori nga manuka pihi nei; ma nga tangata ano e mohio ana ki taua mahi e hanga taua mea hei raranga i nga hao. He mahi tohunga ano hoki tera mahi, no mua iho, no mua iho, no nga tipuna mai ra ano enei mahinga kai, tuku iho ki ona uri. Ka mutu te rara i nga hao ka whakairitia ki runga i nga whata iringa pera. Ka timata mai te mahi i te ngahuru tae noa ki te Matahi ka mutu te mahi o tera ika, ka poia ano ki nga pa nunui, ki nga kainga nohoanga ranei.