Ano he tai e whati nei,
E tipi nei i nga one roa,
Ka pari ki nga one-pu,
Ka heke ki nga wai.
Nga tumanako o nga ra,
Nga tau ka huri nei,
Ka hoki mai hei tataku,
Hei mea kaingakau;
E kore e memeha noa;
He mea kaingakau.

He pua e rere i te hau,
Ka rere atu ki mamao.
Ma wai e kapo mai ano
E hoki ai te roimata?
Engari ia nga wawata,
Nga tumanako o nga ra
Ka hoki mai hei tapuhi,
Hei koingo i enei ra.
E kore e memeha noa;
He mea kaingakau.

Ma nga kapua e rere nei,
E hari atu te aroha,
Ki nga hoa haere o nga ra,
Kua wehe ki mamao.
Ka waiho kau nga wawata
Hei pu-manawa i roto ra,
Hei tangi ma te ngakau nei,
Hei koingo i enei ra.
E kore ra e waiatia
Nga mea kaingakau.

E kori ra e te aroha
I roto ra;
E tangi mo nga hoa ka riro,
Ka mene ki te po.
Te ai he hoa takaarohi
Mo enei ra.
Me kapo kau i te wairua,
Me kore e hoki mai.
Chorus:
Aue! E te aroha!
Aue! te mamae,
E pehi kino nei i ahau,
E kore e mutu mai."

Maringi ra e te roimata,
Nga kamo nei;
He aroha ki te iwi,
Ka motu ki mamao.
Ko wai e kite atu kei hea
Nga hoa o mua?
Ka haramai ka tauwehe
Ka raunga iti au.

E rere ra e te marama
I runga ra;
Engari koe e kite atu
I aku kaingakau.
Ko au ki raro nei tu kau ai,
He mea mahue
Nga tira haere ki mamao
E ngaro atu nei.

Me kimi i te ao nei,
He wahi hei rite,
Ki tou kainga tupu
E matea nuitia nei.
Hei aha nga kino,
page 38 Hei aha ona he
Ka tawhai te ngakau
Ko reira noho ai.
Chorus:
Te kainga tupu!
Te ai ona rite,
E kore e rite.

Ka haere ki mamao,
Kei wareware koe
Te wa ki nga matua,
E tangi atu nei:
Te wa ki te kainga
E okioki ai,
E tau ai te mauri,
Ki reira noho ai.

E te iwi tiro mai,
Nei te kupu o te tau,
Waiho ake nga tikanga o nehe
Whaia nga tikanga hou
O te ora, o te pai:
Whanau hou, me whanau hou tatou katoa.
Chorus:
Maranga, ranga ra ki runga!
Takahia ki raro te mamae.
Whaia ko te mahi pai
Ko te matauranga nui
Takahia ki raro rawa te mamae.

Tangi ai te ngakau nei,
Mo te iwi heke noa,
Mo te motu ka maanu i te wai.
Nei he punga here mai
Nei te kupu whakahau
Whanau hou, me whanau hou tatou katoa.

E topa ra e te wairua
Runga i nga kapua,
E rere ra ki nga whetu
Hei reira noho ai.
Ka kowha kau mai nga rangi ra,
E kore au e wehi.
He wawata na te ngakau nei
Mei au nga whetu ra.
Chorus:
Mei au nga whetu ra
Hei putiputi mou,
Hei tatai i to tinana
E taku kaingakau:
Hei mau ki to uma,
Kia tohia koe e au
Ko Parearau i te po,
Ko kopu i te ao.
Ko Parearau i te po,
Ko kopu i te ao.

Mei penei mai a Tawera,
E tiaho i te rangi.
He huia rererangi ra
Mo taku kaingakau.
E roha ai o parirau
E rere ai ki runga.
He haonga na te ngakau nei
Mei au nga whetu ra.

I moea iho e au
E awhi ana mai to wairua:
Ka whakatata mai koe
Ka piri mai ki au.
Ka puao te ata,
Ka mahea nga wawata:
A, me he wairua
E maheno atu nei.
page 40 Chorus:
Nga anahera: tiro iho kia aroha.
Tiakina i nga kino
He aha koe te maku ai.
E mo te wa nei, e noho mo te wa nei
Te wa tino reka nei
E hotu nei te manawa
He wa wawata roa, kua huri nei
Haere ra! haere ra!

He ao e pahemo
He taonga e memeha,
Ka nunumi atu
Nga pae ki te korenga.
Waihoki te aroha
E kore ra e pumau.
He waha e haerea
Te ai he maunga ringa mai.

Tenei hoki tenei pao
Mo nga toanga onamata;
Huri noa nga rire o te wai,
Tae noa nga puke o uta,
Rongo noa te ao nei
Miharo ana.
Ka iro hoki etahi
Kei warewaretia,
Kei pa mai he he
E heke ai te ingoa,
E heke ai te ingoa toa.
Ka uia mai ko wai hei hapai,
Mahara ki te pepeha:
Chorus:
He hoia na te Kuini,
He maia he whanoke,
Hei tata rakau
Hei kari i nga kauae o te Poa.
Ko wai hei hapai i te toa
I te ingoa o Ngoingoi?
page 41 Ko te hoia a te Kuini,
Ko te katuarehe ra!

Oho mai he riri i tawhiti
Hui nga iwi ki te kimi,
Kimi noa he take e raru ai,
E mate ai te Ingarihi.
Tena e te iwi kia tatanga mai,
Tiakina o tatou
Kei takakinotia,
Kei pa mai h ehe
E heke ai te ingoa,
E heke ai te ingoa toa.
Ka uia mai ko wai hei hapai,
Mahara ki te pepeha:
Chorus:
He hoia na te Kuini, &c.