Te Po O Te Turei.

Na Rev. F. A. Bennett (he tamaiti no Rotorua i akona ki te kura o Tipene i Akarana kua whakapangia hei Minita, kei te takiwa o Whakatu i Te Waipounamu e mahi ana i naianei), te whaikorero ki te hui. He patai nana mehemea ranei ka mau tonu te tangata ki tona whakapono ahakoa pehea te whakawai a te ao?

(I te mea e ngaro tonu ana nga korero a Peneti i te wa i perehitia ai tenei pukapuka, kaore e tuhia te ripoata ki konei engari kei te kupu apiti kei muri o te panui nei.)

Ka tu ake ko Te Reweti, ko Aata Wiremu me Tamati Harapeta ki te tautoko i te whaikorero a Peneti. E rua nga kupu kei roto i te Paipera kaore tonu i te marama ki te Maori, ara, ko te "karakia" me te "whakapono." He mea ke te karakia, he mea ke te whakapono. Kei waho tetahi kei te korero a nga ngutu, me te tuturi o te pona, me te himene i roto i nga wharekarakia. Na he maha nga ahua karakia a te pakeha, kei te raruraru noa nga whakaaro o te Maori ki te whiriwhiri i te mea tika. Otira kotahi tonu te whakapono i tupu ake i te ngakau o te tangata ka ahu atu ki te Atua.

Ka ki a Tamati Harapata (he tamaiti no Turanganui i akona ki Te Aute) kei te noho kino noa te iwi Maori i te iti o te whakapono. Ko tana whakahe ko te mahi e tukua nei nga kotiro ki nga teihana [unclear: hipi] mahi ai i nga takiwa kutikuti hipi, ki reira takakinotia ai e te tangata. E tupu mai ana i kona te raruraru me te kino noa iho.