Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

[Proceedings of some conferences held by Te Aute College Students' Association, 1897-1901, 1906]

He Panui Powhiri—He Kupu Ki Te Iwi

page 17

He Panui Powhiri—He Kupu Ki Te Iwi.

Ki nga Rangatira, ki nga mana, ki nga hapu o te iwi Maori puta noa i Aotearoa, whakawhiti atu ki Te Waipounamu.

Tena koutou,

Ko te tau tuarua tenei i tukua atu ai nga pukapuka o nga korero a a koutou tamariki, a a koutou mokopuna kia koutou. Ko te tuarua tenei o nga tau i whakahaerea ai enei tikanga nunui i waenganui i te iwi. Ka ahu atu ano te tono kia koutou kia tahuri nui mai ki te tautoko i enei mahi, kia manakohia mai e koutou enei wawata hei taonga, i te mea i tupu ake ano i roto ia tatou, kaore i ahu mai i te pakeha. Kua whakaarohia hei tenei tau ka whai atu nga huihuinga a nga taitamariki e piri ana ki tenei Kotahitanga ki nga marae nunui tonu o te iwi Maori, a i runga i te karanga mai a tera wahanga o te iwi, ara, a Ngatiporou kua whakaaria te tuunga mo te hui o tenei tau ki Tuparoa i te takiwa o Waiapu, ko te ra ko te 14 o Tihema e haere ake nei.

He karanga atu tenei kia koutou kia tae mai ki taua hui, kia manaakitia mai nga tikanga e mahia nei e a koutou tamariki, e a koutou mokopuna, e kimi nei ratou i roto i te pouritanga, i te pito ora mo te iwi, i runga i to ratou matauranga ki nga ritenga a nga iwi e rua, e mamae nei ki nga mate o te iwi, ki nga mate tinana, ki te ngakau matapo, ki te pohehe. Ma koutou ma nga kaumatua e tautoko enei huihuinga. Koia i karangatia atu ai kontou kia tae mai ki tenei hui, kia noho tahi tatou ki te tangi ki o tatou mate (haunga ia era e mahia mai ra e te Kotahitanga o te Tiriti o Waitangi) ki te kimi i te ora kei hea ranei.

Na nga rangatira o Ngatiporou i powhiri tenei hui ki to ratou takiwa. E tika ana hoki kia haere nui atu te huihuinga o enei taitamariki whiriwhiri o roto i te iwi Maori ki nga takiwa Maori whakaari ai i a ratou take, whakaatu ai i o ratou whakaaro. Hei tetahi atu wa ka haere atu ai he takiwa ke, i runga i te karanga mai a etahi atu iwi.

Kia ora tonu koutou

Na Te Komiti Tumuaki o te Kotahitanga

o Te Aute Kareti.

Te Aute Kareti, Nepia, Hepetema, 1898.