Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Ko te Paunui o Aotearoa. Mo te Kooti Whakawa Whenua Maori. He Mea ta I Runga i te Mana o Te Kiingitanga Motuhake o Aotearoa

Panuitanga. — Ture Whakaaetanga Whakawa Whenua Maori o te Tau 1894

Panuitanga.
Ture Whakaaetanga Whakawa Whenua Maori o te Tau 1894.

He Panuitanga tenei kia mohiotia ai,—"Ko te ra hei Whakawakanga mo Whakamarama i panuitia i roto i Te Paki o Matariki, kia tu te Whakawa mo taua Poraka i te 6 o nga ra o Hepetema, a, nukuhia ana taua whakawa mo te 6 o nga ra o Oketopa. Heoi i te nui o nga raruraru o te Kawanatanga i te matenga o Kiingi Tawhiao, ki hai i whai ruma te Minita mo nga Kai-whakawa Whenua me te Tumuaki hoki o te Kawanatanga ki te tuku i tetehi o nga Tiati o taua Kooti, koia i kore ai e tu taua whakawa i te ra e mau i runga ake nei." I tae mai te reta a te Wehou ma o te 8 o nga ra o Oketopa 1894, ki te Tumuaki o te Kiingitanga he whakaatu i to ratou kore i pai i te taenga atu o te pukapuka hiki a te Hon. A. P. Rongowhitiao, Te Minita o nga whenua o te Iwi, me nga whenua o te Karauna; mo te 6 o nga ra o Pepuere 1895 ka tu ai taua whakawa. Ko taua hiki, he mea whakahau e te Minita o nga Kaiwhakawa Whenua, e te Hon. M. H. Te Pokaitara, i runga i nga raruraru mo te matenga o Tawhiao e mau i runga ake nei,—A, e whakaatu mai ana a te Wehou ma kanui to ratou pouri mo te hikitanga ki te 6 o Pepuere, 95. Ko ta ratou ra i tono mai ai i roto i ta ratou pukapuka ki te Tumuaki ko te 25 o Oketopa hei tuunga mo te Whakawa o Whakamarama me etehi kupu ano a ratou, a, kua tukua mai taua reta e te Tumuaki ki ahau. "Heoi i te mea kua tukua mai he Mana ki ahau mo taua mahi, koia ka panuitia atu ki raro iho nei.