Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Reports of meetings on Māori Church matters, 1872-1888

Ko Enei Nga Tikanga O Era Atu Hui E Mau Tonu Ana

Ko Enei Nga Tikanga O Era Atu Hui E Mau Tonu Ana.

I.
Mo Tetahi Kura Mo Nga Kai-Whakaako.

Tenei hoki tetahi whakaaro i kitea i roto i tenei Hui; ko tetahi kura mo nga Kai-whakaako kia whakaturia ki te Atirikonatanga o te Waimate.

II.
Mo Nga Kura Ratapu Mo Nga Tamariki.

He whakahau tenei ki nga wahi katoa o tenei Atirikonatanga mo nga Kura tamariki i nga Ratapu kia tu tonu.

III.
Kaua nga Whare-Karakia E waiho hei Whare-kura ra noa.

Ki te whakaaro o tenei Hui, e kore e tika kia waiho nga Whare-karakia hei whare-kura i nga ra noa, engari me whakamotuhake mo te Karakia anake; a me whakatu ano nga wharekura. Ehara tenei tikanga i te pei i nga tamariki i nga kura, erangi he mea kia motu ke te Whare-karakia, kia motu ke te whare-kura.

IV.
Kia aroha nga tangata ki nga Minita ina haereere.

Kia whai aroha nga tangata o tenei Atirikonatanga ki nga Minita ina haereere ki nga kaainga, kia tukua noatia te hoiho me te kai-arahi.

page 8

V.
Mo Nga Moni Haereere A Nga Mangai Reimana.

Kia whakaaro nga tangata o nga Pariha ki o ratou Mangai Remana, ki te whakaea i nga moni e pau ana i a ratou e haereere ana ki nga Hui. Ko aua moni me tango i roto i nga kohikohi, me kohi ra waho ranei.

VI.
Mo Nga Turoro Kia Whakaaturia Ki Te Minita.

He kupu tenei ki nga tagata katoa o ia pariha o ia pariha mo nga turoro kia whaaturia mai ki te Minita; kia kaua e waiho kia takoto noa iho a taea noatia to ratou matenga, ka korerotia ki te Minita. He tino mea pouri tenei.

VII.
Mo Nga Pukapuka Karakia Kia Hohorotia.

Ka pau nei nga Rawiri tawhito, he kupu tenei na te Hui ki nga Kai perehi Rawiri kia tere te whakaputa mai i nga pukapuka.

VIII.
Mo Nga Kai-Whakaako Kia Whakaarohia E Nga Tangata.

Kia whai whakaaro ano nga tangata ki o ratou Kai-whakaako ehara nei i te Minita, ki te whakamama i a ratou.

He inoi mo te Hui o te Hahi Maori.

E te Atua kaha rawa, kua oti nei te whakakotahi e koe Tau hunga whiriwhiri katoa hei tinana mo Tau Tama, mo to matou Ariki, mo Ihu Karaiti: ki te huihui hoki o tangata ki tetahi wahi i runga i tona ingoa, kei reira ano koe: Kia anga mai to whakaaro atawhai ki tenei wahi o To Hahi, manaakitia mai hoki matou, te Pihopa me nga Minita me nga Mangai o te iwi kua mine mai nei ki te rapu tikanga. Kia riro mai i a matou nga taonga maha a Tou Wairua Tapu, ara, te mahara, te mohio, te kaha, te aroha, me te ata whakaaro; kia whai tonu ai matou i roto i a matou mahi katoa ko koe kia whakakororiatia, ko te pai o To iwi kia kake, ko Tou rangatiratanga kia whakanuia: Kei meatia tetahi mea e matou i runga i te tikanga totohe, i te whakapehapeha, i te mataku ranei i te tangata: kei he hoki a matou mahi i te whakaaro poka noa ake, i te hianga ranei o te tangata: engari kia ata whakatakotoria nga tikanga katoa e tupu pai ai To Hahi i roto i a matou; kia mahia ai e matou katoa nga mahi pai kua rite mai nei i a Koe hei mahinga ma page 9matou; kia whakakotahitia ai matou katoa i roto i te whakapono, i te aroha; kai rite tahi ai hoki o matou whakaaro me o matou mangai te whakakororia i a Koe; ko Ihu Karaiti hoki to matou Ariki. Amine.