I mine te Hui te Hahi Maori o te Atirikonatanga o te Waimate, ki te Wharekarakia o Hoani, te Waimate. Ko te karakia he karakia Whakaunga, a e whitutekau ma whitu te hunga i whakaukia. Ko nga tangata i tango i te Hapa a te Ariki 132. Ko nga ohaohatanga (£ 2.2s. 6d.) i tukua mo nga mahi a te Hui.

Ka mutu te inoi mo te Hui o te Hahi Maori ia te Pihopa, ka kiia e ia, he Hui e rite ana ki ta te Ture, Na, ka tu a te Pihopa ka korero—ko ana koreto enei.

Me maatua whakapai atu tatou ki te Atua mo tana mahi tohu ia tatou i nga ra kua pahure nei. Mehemea kua taea e tatou etahi mea e pai ana, me waiho ki a ia te Kororia. He mahi atawhai nona i huihui ai tatou i tenei ra ki te rapu tikanga e whai pai ai tenei wahanga o te Kahui o te Karaiti. Tenei etahi take i tika ai kia puta ta tatou whakapai, ara (1) mo nga minita hou tokowha nei ka uru ki tenei Hui; (2) mo te mea kahore tetahi o nga tangata o te Hui i ngaro i te mate. Kotahi ia o nga kaumatua o te Hahi kua riro atu ia tatou, ara, ko Henare Tipi, he kai karakia no mua iho ra ano no te Waimate, a ko apopo whakatakotoria ai tona tinana ki te oneone. Mehemea i maha atu nga kai karakia i rite to ratou ahua ki ta Henare Tipi, tera e maha noa atu nga tangata e riro mai ki te Atua. He hua nga minita Maori tokomaha nei na nga mahi a nga Kai karakia whaingakau na konei i whai hepara ai nga hipi a te Karaiti o tenei takiwa o te Pihopatanga. Ka whai minita nei nga hapu katoa o tenei Atirikonatanga tera pea e tokomaha noa atu nga taitamariki e arahina mai ki te Pihopa kia whakaukia; ekore e waiho nga tamariki kia tupu iriiri kore, ekore hoki e moe Maori nga tane me nga wahine, erangi e marenatia tikatia. Na, he kupu tenei naku ki nga tangata ehara nei. i te minita. Kaua koutou e mea me noho noa iho koutou. He mahi ano ta tenei ta tenei, o ia tangata, o ia tangata o te Hahi. Ko nga minita nga kai-whakahaere o nga mahi, a me uru te katoa ki te mea e whakaritea ana, kia tupu ai te whakapono. Kia kotahi ano te page 4ngakan a te minita me taua kahui; ma taua kotahitanga hoki ka kaha ai. Ehara hoki i te mea heoi ano te mahi ma te katoa ko te karakia nui ki te Atua, kahore, tera atu ano etahi mahi; ara, ko nga tikanga e tau ai te pai ki te iwi, ko nga kura ra noa, ko nga kura Ratapu kia akona ai nga tamariki ki nga mea e ora tahi ai te tinana me te wairua.

E ora ana toku ngakau ina maharatia e au te nekenga ake o nga Maori i nga tau kua pahure tata nei. Na nga tahua whangai minita i kitea ai e whaka-aetia ana nga kupu a Paora; "Pera tonu hoki ta te Ariki i whakarite ai mo nga kai kauwhau o te Rongo Pai, hei te Rongo Pai he oranga mo ratou"— I Koroniti ix. 14. I kitea te uaua o nga tangata o Waimamaku, o Kaikohe, o te Waimate i te tau kua pahure nei. He pai kau nga korero mo te tokomahatanga o nga tangata ki te Karakia, mo te pai hoki o to ratou ahua noa iho ki o ratou kaainga. He whakamahara tenei ki nga minita kia ata tika a ratou whakaatu mai ki au i te maha o nga tangata Karakia, o te hunga tango i te Hapa Tapu, i nga tamariki kua oti te iriiri i nga aha noa o a ratou Pariha hei tukunga atu maku ki te Hinota Nui o 1877.

He kupu whakatupato tenei naku ki te Hui. He pono he maha nga mea e kite nei tatou hei tohu e whai manawa ana te whakapono o nga tangata o tenei takiwa, a me whakapai atu tatou ki te Atua mo ena tohu; otira kei pohehe tatou. Ko ena mea, ko nga tahua whangai minita, ko nga whare-karakia, ko nga whakaminenga nunui, he mea no waho anake. Kahore he rawenga o ena mea ki te kahore he mahi whakawairua. Kaua tatou e kuare, e waiho ko te paparahi hei whare, kaua e kiia te papapa o waho hei karihi. Ko te mea e paingia ai a tatou mahi e te Atua ko te tukunga i o tatou ngakau ki a ia. Na ka tahuri nei tatou ki te rapu tikanga e neke ai te pai a te Hahi me haere a tatou whakaaro i runga i te Inoi mo te wiki nei^* "tukua mai hoki kia kite, kia matau ratou ki nga mea e tika ana hei mahi, kia kaha hoki ki te whakarite i aua mea."