.jpg)
Reports of meetings on Māori Church matters, 1872-1888
He Tikanga, He Whakaaro Hoki No Te Hui
He Tikanga, He Whakaaro Hoki No Te Hui.
I
Mo Nga Tangata E Meinga Ana Hei Minita.
He whakaaro i kitea i roto i tenei Hui mo nga tangata e meinga ana hei Minita; kia whiriwhiria i roto i o ratou iwi ake. Ma tenei hoki e kakama ai nga tangata ki nga kohikohinga whangai Minita.
II.
Mo Tetahi Kura Mo Nga Kai-Whakaako.
Tenei hoki tetahi whakaaro i kitea i roto i tenei Hui; ko tetahi kura mo nga Kai-whakaako kia whakaturia ki te Atirikonatanga o te Waimate.
III.
Mo Nga Kura Ratapu Mo Nga Tamariki.
He whakahau tenei ki nga wahi katoa o tenei Atirikonatanga mo nga Kura tamariki i nga Ratapu kia tu tonu.
IV
Kaua Nga Whare-Karakia E Waiho Hei Kura Ra Noa.
Ki te whakaaro o tenei Hui, e kore e tika kia waiho nga Whare-karakia hei Whare-kura i nga ra noa, engari me whakamotuhake mo te Karakia anake. Na, ko nga Whare-karakia, na te Kawanatanga nei tetahi wahi, na nga Maori tetahi wahi, me whakahoki nga moni a te Kawanatanga, me whakatu ano i nga Whare-kura. Ehara tenei i te pei i nga tamariki i nga Kura, otira he mea kia motu ke te Whare-karakia, kia motu ke te Whare-kura.
V.
Kia Aroha Nga Tangata Ki Nga Minita Ina Haereere.
Kia whai aroha nga tangata o tenei Atirikonatanga ki nga Minita ina haereere ki nga kainga, kia tukua noatia te hoiho me te kai-arahi.
VI.
Mo Nga Pukapuka Karakia.
Kia tonoa atu e te Atirikona ki nga Kai-tiaki o nga pukapuka, kia tukua mai he Rawiri, he Kawenata, he Paipera; a me hoatu ki nga Kai-karakia ma ratou e hoko atu ki te iwi.
VII
Mo Nga Moni Haereere A Nga Mangai Reimana.
Kia whakaaro nga tangata o nga Pariha ki o ratou Mangai Reimana, ki te whakaea i nga moni e pau ana i a ratou e haereere ana ki nga Hui. Ko aua moni me tango i roto i nga kohikohi.
VIII.
Mo Te Whiriwhiringa I Nga Mangai Reimana.
Hei a Nowema e haere ake nei ka whiriwhiri ai i nga Mangai Reimana e ia Pariha, e ia Pariha.
IX.
Te Kainga Me Te Ra Mo Tenei Ake Hui.
Ki te Waimate te Hui o te Atirikonatanga i te tau 1876, hei te Wenerei, te 12 o Hanuere.
He Inoi Mo Te Hui O Te Hahi Maori.
E te Atua kaha rawa, kua oti nei te whakakotahi e koe Tau hunga whiriwhiri katoa hei tinana mo Tau Tama, mo to matou Ariki, mo Ihu Karaiti: ki te huihui hoki O tangata ki tetahi wahi i runga i Tona ingoa, kei reira ano Koe: Kia anga mai to whakaaro atawhai ki tenei wahi o To Hahi, manaakitia mai hoki page 7
matou, te Pihopa, me nga Minita, me nga Mangai o te iwi kua mine mai nei ki te rapu tikanga. Kia riro mai i a matou nga taonga maha a Tou Wairua Tapu, ara, te mahara, te mohio, te kaha, te aroha, me te ata whakaaro; kia whai tonu ai matou i roto i a matou mahi katoa ko Koe kia whakakororiatia, ko te pai o To iwi kia kake, ko Tou rangatiratanga kia whakanuia. Kei meatia tetahi mea e matou i runga i te tikanga totohe, i te whakapehapeha, i te mataku ranei i te tangata: kei he hoki a matou mahi i te whakaaro poka noa ake, i te hianga ranei o te tangata: engari kia ata whakatakotoria nga tikanga katoa e tupu pai ai To Hahi i roto i a matou; kia mahia ai e matou katoa nga mahi pai kua rite mai nei i a Koe hei mahinga ma matou; kia whakakotahitia ai matou katoa i roto i te whakapono, i te aroha; kia rite tahi ai hoki a matou whakaaro me o matou mangai te whakakororia i a Koe; ko Ihu Karaiti hoki to matou Ariki. Amine.