Title: Reports of meetings on Māori Church matters, 1872-1888

Author: Church of England. Diocese of Auckland

Publication details: Henry Hill, 1872, Auckland

Part of: He reo nō ngā rōpū whakahaere tikanga / The language of Māori governing bodies.

License: Creative Commons Attribution-Share Alike 3.0 New Zealand Licence

Share:

He reta mihi mo Waikato.

Ki a Tawhiao me ona iwi o Waikato. He pukapuka mihi, whakapai, tena na te Hui o te Hahi Maori i mine ki Parengarenga i a Pepuere 27, 28, 1885, ki nga iwi o Waikato.

Tena koutou, Kia ora tatou i roto i te Ariki. Tenei te Hahi Maori o te Atirikonatanga o te Waimate, i te Pihopatanga o Akarana, te tuku atu nei i te kupu whakapai ki a koutou. Kua kitea hoki i naianei te nui o to koutou atawhai ki ā matou tamariki i tukua atu nei ki nga wāhi o Waikato i runga i nga whakahaunga a te Ariki kia kauwhautia tana kupu ki nga wāhi katoa, ara, ki a Rev. Renata Tangata raua ko Rev. Wiki te Paa. E whakapai ana matou mo to koutou tahuritanga mai ki te ata whakarongo ki te Kupu a te Atua i a raua e karakia ana i waenganui ia koutou. Ora ana o matou ngakau i to matou rongonga ai i te nui o a koutou tikanga pai ki a raua i a raua e mahi ana i roto i a koutou; na reira ka whai kupu atu nei hei whakaatu i to matou hari. Na, e hoa ma, ko to matou hiahia nui kia tahuri mai koutou ki te whakapono tika, kia paiheretia tatou ki te paihere kotahi, ki te whakapono ki te Atua kotahi. Na reira i tonoa atu ai ā matou tamariki hei kawe atu i ta matou kupu ki nga iwi o Waikato, me era atu wahi, ki te tawhiri atu i a koutou kia hoki mai ki to tatou whakapono tuatahi, ki te manatunga a o tatou matua, ara, ki te whakapono o Ihu Karaiti. No te Hui i Waitangi i a Maehe, 1884, ka whakaputaina ta matou kupu aroha mo koutou;—a, to naianei ko te kupu whakapai.

Na, e nga hoa aroha, e nga iwi o Waikato, ka mau tonu te mahara a te Hahi Maori ki a koutou. Tenei hoki tetahi mea page 14kia marama koutou, ekore pea a matou tamariki e tae atu ki te Hui ka tu nei ki Whatiwhatihoe a Maehe 12 nei, he nui no a raua raruraru i tenei taima, a tera ano he taima e hoki ai ano raua kia koutou. Hei kona, paiheretia mai tatou ki te paihere kotahi i roto i te Atua, i runga i tenei kupu a te Apotoro:— "He pouritanga koutou i mua; tena ko tenei, he maramatanga koutou i roto i te Ariki; kia rite te haere ki to nga tamariki o te maramatanga"—Epeha v. 8.

Na Te Hahi Maori.