Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Reports of meetings on Māori Church matters, 1872-1888

Te Whai-Korero a te Tumuaki

Te Whai-Korero a te Tumuaki.

E hoa ma, e te hunga kua mine mai nei ki tenei Hui, Tena koutou katoa. Ko taku kupu tuatahi he whakahau atu ki a koutou kia mātua wkakapai atu tatou ki te Atua mona i arahi ora mai i a tatou ki te timatanga o tenei tau hou. Mehemea hoki kua taea e tatou etahi mahi e tika ana ki te titiro mai a te Atua i enei tau kua pahure ake nei; me waiho atu e tatou ki a Ia te kororia me te whakapai nui. He mahi tohu hoki nona i taea ai e tatou te huihuinga mai ki Tona aroaro inaianei ki te rapu tikanga ma tatou, e whai painga ai, e tupu ake ai he kaha mo tenei wehenga o te Hahi a te Karaiti. Kia tau iho ki tenei Hui te manaakitanga mai a te Atua, kia meinga ai e Ia nga tikanga katoa e whakatakotoria marietia hei whakaneke ake i Tona rangatiratanga ki tenei takiwa o to tatou Pihopatanga. Heoi, e hoa ma, he mea whakahari rawa atu tenei inaianei, ara, to tatou huihuinga mai, i tera wahi, i tera wahi, a poto mai ana nga Mangai Reimana me nga Minita Maori tokowaru, me to tatou matua me Rev. A. Whareumu raua ko Riwi Taikawa. Ko taua hunga i haere mai i te whenua mamao, na kona ka kite ai tatou tetahi i tetahi, he kanohi he kanohi. Na, e hoa ma, he kotahi enei mea me whakaatu ake ano e ahau. E tangi ana te ngakau, me te hinengaro ki te korenga nei o o tatou matua o te Pihopa raua ko te Atirikona o te Waimate, o Rev. J. Matiu o Kaitaia. Kahore nei hoki tetahi o ratou i tae mai ki te nohoanga o tenei Hui. Heoi ra e taea hoki te pehea ua ratou ? Ko te Pihopa, he nui rawa no ona raruraru ki te whakatutuki i ana haere ki nga wahi i whakaritea e ia. Ko to tatou Atirikona, he raru nui kua pa mai ki a ia, ara ki te mate nui o Mihi Karaka, na reira ia i kore ai i ahei te haere mai. Na, ko taku whakahau page 6tenei ki nga mema katoa o tenei Hui, kia inoi atu tatou ki te Atua mona kia tohungia. Ko to tatou matua ko te Matiu, ko te mate o te koroheketanga kua tae atu ki a ia, na kona te ahei te haere mai ki tenei wahi tawhiti. Heoi ra e aku hoa, ahakoa kahore o ratou tinana i konei, ko o ratou mahara me o ratou ngakau kei konei ano e mahi tahi ana me tatou mo tenei manga o te Hahi o te Atua.

Na, kua tae mai te kupu a te Pihopa, he whakahau mai i au hei whakakapi kau iho mo to raua nohoanga ko te Atirikona. Tenei taku, e hoa ma; kei waiho te korenga nei o o tatou matua i roto nei i a tatou hei whakangakau kore i a tatou a ka noho wairangi noa iho, engari, me tahuri tatou me ata mahi i a tatou mahi i roto ano i te Ariki. E rite ana hoki tatou e huihui nei inaianei ki te kaipuke i waenga moana; ko nga rangatira kua hoe ki uta, a kiia iho ana e nga rangatira ma nga heramana e whakatere te kaipuke mo tetahi wahi iti nei. Na, mehemea ka waiho tera hei whakangakaukore mo aua heramana, ara, te ngaronga atu o nga rangatira, a ka noho wairangi noa iho, ekore e roa kua paea te kaipuke; te mutunga, he pakaru. Waihoki, he kaipuke tenei, ko te Hahi Maori. I runga i nga mea whakararu ki o tatou matua, kua kiia mai ma tatou e whakatere tenei kaipuke i te wa iti nei. Na reira tenei kupu aku ki a tatou kia ngahau ki te mahi i ta tatou mahi,—nga minita me nga mangai reimana me te iwi katoa hoki o te Hahi Maori kua hui mai nei ki tenei wahi—kei paea haeretia to tatou kaipuke a ka pākarukarua e nga toka maha o tenei ao kino. Na, e hoa ma, kua wkakatauiratia mai e o tatou mātua i roto i nga Hui o nga tau kua pahure ake nei, hei whakaatu mai i nga tohu i kitea ai e whai manawa ora ana to tatou whakapono, ara, to te Hahi Maori.

Ko enei nga tohu i kite ai ahau. (1.) Ko te whakamotuhanga o tetahi o nga rangatira Maori ki Paihia i te tau kua pahure nei hei rikona mo te Hahi a te Karaiti, hei hapai i ana tikanga, ara, a Hemi Taitimu o Parengarenga. (2.) Ko te whakaaetanga mai o Tawhiao ki a te Pihopa raua ko te Karaka kia tukua atu etahi o a tatou minita hei kawe atu i te rongoa, ara, i te Rongo Pai ki nga iwi o ona takiwa. Heoi, kitea ana te manaaki o Tawhiao i nga tamariki o te Hahi Maori i tae atu nei ki Waikato. A, ki taku whakaaro, ekore e maha nga tau e haere ake nei ka huri mai a Waikato ki te whakapono tika. (3.) Ko te otinga o tetahi Wharekarakia pai rawa i Kaikohe i tenei tau, ko tona utu i neke ake i te £670. Nui atu te uaua o Rev. M. Kapa me tona iwi ki te mahi moni mo taua whare, a i te whakapuaretanga e the Pihopa i 11th o nga ra o te marama kua pahure ake nei, hore rawa he nama o taua Wharekarakia. (4.) Ko te awhina mai a o tatou hoa kaikarakia ehara nei i te page 7minita i nga mahi o te Hahi. A he mea tika rawa kia whakaputaina he kupu whakawhetai mo to ratou kaha ki te awhina i te Hahi; kei te tino mohio hoki tatou kei te kaha rawa te mahi a aua kaikarakia. Na te uaua o ta ratou mahi i whai oranga ai te kahui inaianei.

Kei te mohio ano ahau kei te koa mai nga ngakau o o tatou mātua pakeha ki enei ahua e tirohia mai nei e ratou mo tenei wahi o te Hahi o enei wa, o nga wa hoki kua pahure ake nei. Na, e hoa ma, ko enei mea katoa he tohu e mohio ai tatou he manawa ora to te Hahi Maori; otira kei te matau tahi tatou ki nga mahi hē i roto ia tatou. Na ko taku kupu ki a tatou kia whakarerea rawatia atu te kororia hua kore, ara te inu waipiro. Ko nga mahi reihi hoiho hoki he mea kino, ina hoki kei reira te haurangi, te peti, me te maha atu o nga takaro kino i roto i nga pera, ekore nei aua tikanga e waiho hei pai mo tatou.

E hoa ma, heoi nei ano aku korero ake ki a tatou; me tahuri tatou ki te whakaaro i a tatou mahi i roto i te Ariki. Ki te kahore hoki te Atua hei awhina i te mahi, ekore rawa e taea e tatou te mea i Tana e pai ai, na reira e tika rawa ana te Inoi nei:—E te Ariki kia haere i mua, kia aru mai i muri Tou kaha i a matou; meinga hoki matou kia mahi tonu i nga mahi pai katoa, ko Ihu Karaiti hoki to matou Ariki. Amine.