I Mine te Hui o te Hahi Maori o te Atirikonatanga o te Waimate ki te Wharekarakia i Paua, Parengarenga i Pepuere 27 me 28, 1885. No te tekau o nga haora i te ata o te Paraire te 27 o nga ra, ka whakapuaretia te Hui. Kotahi rau tangata i te karakia, e ono tekau i tango i te Hapa a te Ariki. Ko te ohaohatanga (£3 6s. 3d.) i tukua mo te perehihitanga i nga mahi o te Hui. No te rua karaka i te ahiahi ka noho te Hui. He hui tenei, he mea ata homai na nga kaumatua ki nga Maori anake, i te maha o o raua raruraru; a, ko Rev. R. W. Tangata hei tumuaki mo taua huihuinga hei whakakapi mo te Upoko, ara, mo te Pihopa. I karangarangatia e Rev. R. W. Tangata nga ingoa o nga mema; muri iho ka kiia e ia he hui ano tenei e rite ana ki ta te ture i whakatakoto ai, ka timataia hoki e ia te mahi ki te Inoi. Katahi ia ka whaikorero ki te Hui.