Reports of meetings on Māori Church matters, 1872-1888
Ko Enei Nga Tikanga o Era Atu Hui e Mau Tonu Ana
Ko Enei Nga Tikanga o Era Atu Hui e Mau Tonu Ana.
I.
Mo Nga Kura Ratapu mo nga Tamariki.
He whakahau tenei ki nga wahi katoa o tenei Atirikonatanga mo nga Kura tamariki i nga Ratapu ki tu tonu.
II.
Kaua nga Whare-Karakia e waiho hei Whare-kura Ra Noa.
Ki te whakaaro o tenei Hui, ekore e tika kia waiho nga Whare-Karakia hei whare-kura i nga ra noa, engari me whakamotuhake mo te Karakia anake; a me whakatu ano nga whare-kura. Ehara tenei tikanga i te pei i nga tamariki i nga kura, erangi he mea kia motu kē te Wharekarakia, kia motu kē te whare-kura.
III.
Kia Aroha Nga Tangata Ki Nga Minita Ina Haerere.
Kia whai aroha nga tangata o tenei Atirikongatanga ki nga minita ina haerēre ki nga kainga, kia tukua noatia te hoiho me te kai-arahi.
IV.
Mo nga moni haerere a nga Mangai reimana.
Kia whakaro nga tangata o nga Pariha ki o ratou Mangai Reimana, ki te whakaea i nga moni e pau ana ia ratou e haerēre ana ki nga Hui. Ko aua moni me tango i roto i nga Kohikohi, me kohi ra waho ranei.
V.
Mo Nga Turoro Kia Whakaaturia Ki Te Minita.
He kupu tenei ki nga tangata katoa o ia Pariha, o ia Pariha, mo nga turoro kia whakāturia mai ki te minita-; kia kaua e waiho kia takoto noa iho a taea noatia to ratou matenga, ka korerotia ki te minita. He tino mea pouri tenei.
VI.
Kia Haerere Nga Minita Ki Te Tirotiro I Nga Kura.
Kia tae tonu nga minita ki nga kura tamariki i nga ra noa, ki te whakaako i nga tikanga o te Whakapono.
VII.
Kia Whakamutua Te Mahi Maori Ki Runga Ki Nga Tamariki.
Kaua nga tikanga Maori ki runga i nga tamariki kohunga-page 14hunga i mua i to ratou iriiringa, a hei muri ka kawea mai kia iriiria. He tino mahi hē rawa tena; kia whakamutua rawatia taua tikanga Maori i roto i nga tangata Karaitiana.
VIII.
He mahi ma nga Hahiwatena.
Ma nga Hahiwatena o ia kaainga o ia kaainga e whakaatu ki te minita ina tae atu, i nga tamariki mo te iriiri.
IX.
He Rehita iriiringa, marena, tanumanga.
Kia tu nga whare-karakia nunui katoa i nga Rehita iriiringa, marena, tanumanga.
X.
Nga whenua o te Hahi.
Kia hohoro te whakamotuhake i nga whenua mo te Hahi, karauna karaati rawa, ka tuku ai ki nga kaitiaki (trustees).
XI.
Nga kohikohi o nga Whare-karakia.
Kaua nga kohikohi o nga Whare-karakia e meinga hei hoko kai mo nga Hui o te Hahi, erangi me ra waho he kohikohi mo ena mea.
XII.
Kai Titiro I Nga Moni.
Ma te minita me tetahi tangata ke, ehara nei i te Hahiwatena, e titiro nga pukapuka hokihoki, e tatau hoki i nga moui o nga Pariha.
XIII.
Tikanga Mo Te Nehu Tupapaku.
Kaua nga Kai-karakia e pokanoa te nehu i te tupapaku i te mea a tata ana te minita. Kia whakaae ra ano te minita, katahi te Kai-karakia ka nehu.
XIV.
Moni Mo Te Iriiri.
Kaua te minita e tono i te moni mo te iriri; otira, ki te hiahia nga matua kia homai noa mai he mea ma te minita, e pai ana kia tangohia e ia.