Nga Mangai Reimana.

Kihai enei i tae mai ki te Hui.

I Tu te Hui ki Hauraki i te Mane te 8 o Maehe. I huihui katoa ki te whare karakia i Mataparu mo te karakia timatanga i te ata o te Ratapu te 7 o Maehe, ka mutu te karakia mo te ata ka tae ake te Pihopa, i te tekau ma tahi, ka karakia, taua karakia ko te Hapa Tapu, me te whakapakanga ringaringa. Ko te timatanga o te Karakia Hapa Tapu i a Rev. Heta Tarawhiti minita o te Takiwa o Waikato, ko te Tuhituhi i a Rev. W. Turipona minita o te Takiwa o Hauraki. I reira hoki a Rev. Hohua Moanaroa minita o te Takiwa o Waipa, i a ia hoki te kauwhau i te karakia o te ata, ko te kauwhau a Te Pihopa no te Rongopai mo taua ra (te Ratapu tuawha o Reneti) i a Hoani vi. 11. Ka tuwha atu ki nga akonga, a na nga akonga ki te hunga i noho ra; i tohutohungia e ia, ko te mea tika kia marama nga ritenga mo te whakahaere i te mahi o te Hahi, kia uru katoa hoki te nuinga hei hoa mahi, i whakaaturia hoki e ia nga mahi hei mahi ma te nuinga, haunga nga mahi ma nga minita. Ko te kohikohi i taua ra i tukua mo nga raruraru o te hui. I tu te Hui o te Hahi ki te roro o te whare whakairo a Te Hotereni Taipari i te 9 o nga haora o te mane te 8 o nga ra o Maehe. Ka mutu te karangaranga a Te Pihopa i nga ingoa o nga mema o te hui. Ka kiia e ia kua tu te hui. Ka mutu te karakia, ka puta tana kerero, tokowha nga minita i reira, tekau ma wha nga Mangai Reimana. Ko te Paki i whakaturia hei kaituhituhi hei kaiwhakamaori hoki mo te Pihopa. Ko Rev. W. Turipona hei kaitiaki mo nga moni. Ko nga kupu timatanga o te korero a te Pihopa he whakaatu i nga take me nga ritenga o te hui o te Hahi. I te hui i te tau 1878 ko nga Takiwa o Hauraki, o Kaipara, o Waikato, me Waitemata i hui tahi ki Hauraki; otira i tenei hui kahore i tae mai nga mema mo Kaipara no te mea kua whakaurua to ratou takiwa ki te Akirikonatanga o te Waimate i runga i to ratou hiahia ake. Ka whakaaetia hoki e te Pihopa ta nga whakaminenga me nga minita i pai ai; a te otinga pea o te reriwe o Hauraki ki Waikato, me to Waikato ki Kaipara tera pea ka kitea ka pai kia tu te Hui ki tetahi wahi ke atu, pera hoki me tera ki te Waimate: ko nga mahi ma te Hui he mahi nunui anake. Kahore e mahi huhuakore mehemea ka uru tahi ratou ki te whiriwhiri, ki te whakakaha tetahi i page 4tetahi, kia kaha ai ki te mahi i te mahi o te Hahi, ki te huhuti i nga pakiaka o te kino, ki te rui i nga purapura pai o te pono a te Atua. Ma te awhinatanga anake a te Wairua Tapu ka muta ai te mahi a te tangata i nga mahi kikino, ka mohio ai ia ki te mahi i nga mahi papai. Engari ko ta te tino kai mahi i pai 'ai kia uru tahi te Hahi me te hunga whakapono katoa kia mahi tahi me ia hoki i tana mara. Na i runga i tenei mahi me tahuri o tatou maharatanga i te tuatahi ki nga reme o te kahui a Te Karaiti, ara ki nga tamariki o nga kainga o nga mema o te hui. Me mahi nui nga matua, nga minita, me era atu kaiwhakaako ki te whakaako i nga tamariki kia mohio ai ratou ki te korero i te kupu a te Atua, me ako hoki ratou ki te korero Pakeha, ki uru ai hoki nga taitamariki ki te whakahaere i nga mahi Kawanatanga, me era hoki o ratou e mahara ana ki te mahi o te Hahi. Ko te tuarua o nga putake korero a te Pihopa hei whakanui haere i te mahi o te Hahi, he whakatu Kai-karakia Reimana, i te Takiwa o te Waimate tera i tae ki te kotahi rau nga Kai-karakia Reimana e mahi ana i runga i te tohutohu a nga minita, na i te mea e noho takitahi haere ana nga tangata o enei wahi, ara o Hauraki, o Waikato, me Karamaene, ma taua tikanga nei anake e taea ai te whakahaere te mahi o te Hahi. Ko nga tangata katoa kua hoatu i o ratou ngakau ki te Atua me tahuri ki te mahi i tenei mahi, ka tau ai te manaakitanga ki runga ki a ratou ki ta ratou mahi hoki. E rua nga putake i homai e tera ki te Waimate hei kawenga mai ma te Pihopa ki tenei huihui.