Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

[Circular, 23 February 1876, about candidates in Eastern Māori electorate]

page break
Taranganui, Pepuere, 23, 1876.

Ki nga Iwi, me nga Hapu, me nga Rangatira

Tena koutou,—

He kupu atu tenei kia kontou, kaua e Whakaronga ki nga kupu Whakawa i a te tangata, me puru e koutou taringa, kaua e tahari atu.

Ke nga korero a Henare Matua raua ko Henare Tomoana, he patipati kia tahuri atu ai ki te pooti ia Karaitiana hei Mema mo ratou ki te Paremata, hei kawe i nga korero mo Heretaunga ki reira korerotia ai. E rima nga tau o taua Mema ki te Paremata, kore rawa kia matenga mounu mai ki uta kore rawa atu, a; he aha ano ra te take e takare nei ano ia ki reira; kitea te kiri haunga ki te hi ika, ka haere noa me mutu tou haere e te kiri haunga, me tuku atu hoki he tangata ke, me kore e mate ia ia te ika.

Na E hoa ma, titiro atu tatou kia te Makarini ki te tangata pai aroha, ki te iwi Maori, kaore ona patipati, kaore ona tinihanga kore rawa atu; kore ki manahuna; kore rawa. Katahi ano au ka rongo ake kei a ngati hori he ora mo tatou, ara kia tahuri tatou ki te pooti ia Karaitiana ka ora ai taton. He tino teka rawa tenei he patipati, he mea kia tahuri atu ai taton, ki te pooti i a ia, ki te mea ka pooti tatou i a ai, ka tu ia ki te Paremata; ka tahuri mai ia ki te Whakakaitoa kia tatou, a ka pera ano ana korero me ona tau tuatahi e rima, ka mahi ano mo tona whenua anake. He pena hoki ana korero i nga ra katoa, mo nga mate anake o tona whenua; mo te turaki ano hoki i a te Makarini ratou ko ona hoa. He hae ora te mahi nei ki te tangata tera tatou e kite he mate te tukunga iho. Na e hoa ma, ko te mea pai rawa kia hoe he iwi i tona Waka, i tona Waka, kia kotahi te whakaaro, a ia iwi, ai a iwi, ko tona Waka kia u ki uta. Tena e nga iwi o te rawhiti nei timata mai i te Wairoa, tae atu ana ki Opotiki, kia kaha te hoe i to Waka ahakoa tutua, mohio kore te tangata e paingia ana e koe hei kai whakahaere i to Waka, ma te kaha anake ka mohio ai taua tangata ka rangatira ai. He penei ano hoki a Karaitiana na te mea kua tu ia ki te Paremata i mohio ai ia. Kati me tuku hoki nga iwi nei kia uru ki taua whare Whakarongo ai, ko nga kupu pea a Karaitiana i mahue i a ia, i roto i nga tau e rima, mana etuku pitihana ki te tangata e tu i naia nei, ki te tuku tangata mai ia ki konei hei tango pooti mona ka mohio tatou. E hara, i te mea mo tatou tana tohe ki te Paremata, erangi mo tona wahi anake mo Heretaunga. Hei reira tatou mohio ai, katahi ka hui i nga whakaaro katoa o nga iwi o konei ki te pooti Mema mo tatou, kaua ano hoki e tukua mai nga kai pooti o Nepia, ki konei patipati tangata ai hei whakatokomaha i nga tangata mo Karaitiana, kua ki ratou e rima mano o raton tangata mo to ratou pooti.

Ki te kore ratou e tae mai ki konei tango pooti ai, ka tika to ratou kupu, ki te tae mai ki konei, katahi tatou ka mohie he tinihanga a ratou mahi katoa, he whakawehiwehi kia wehi ai tatou, he mea kia riro ai ia ratou te Mema, me whakamatau tatou ki te rima mano o Heretaunga, me hui hoki o tatou whakaaro o enei iwi kia kotahi. Tena e nga iwi nei kia kaha ki tou Waka, me te Arawa kia kaha ki tona Waka, kei te unga anake ki uta te tikanga e tangi ai te umere mo tona terenga.

Heoi nga kupu nei,

Na e koutou hoe pono,

Na Kereketa, ma.