[ko te tohutoro i roto i te reo Pākehā]

Ki nga Rangatira o te Parameti kei Poneke e noho huihui ana.

He petihana tenei na matou no nga Rangatira Maori, e mau nei a matou ingoa ki tenei pukapuka. E inoi atu tenei kia whakarerea tetahi tekiona o te ture mo nga "Whenua Maori, 1874."

Ko te tekiona e mea ana matou kia whakarerea atu, koianei:—

"Ki te tuku atu a matou whenua, hei reti, ki te hoko ranei, me haere rawa matou ki te aroaro o tetahi tino kai whakawa, hei reira tuhituhi ai a matou ingoa ki nga Riiti."

Na, e pai ana taua ture mo etahi atu takiwa e noho tata ana nga Kaiwhakawa ki nga kainga Maori. Ko te he o konei he pa mamaotanga o nga kainga o nga Kaiwhakawa, e kore ai matou e ahei ki te whakarere atu a matou kainga, me a matou wahine, tamariki hoki, ki te haere atu ki nga kainga pa mamao atu. He kino hoki tetahi no nga ara, he waipuke, he aha atu.

Ko tetahi kupu hoki tenei, ki ta matou titiro, kaore rawa penei te ture mo nga hoa pakeha o to tatou Kuini, mo matou anake tenei ture.

E hoa ma! Me aroha mai koutou ki tenei pitihana a matou. He nui rawa ta matou arruraru [sic], me ta matou hoha ki tenei tekiona o taua ture.