Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Petition of Haimona Te Aoterangi, and 167 others : presented to the House of Representatives on 18th August, 1874.

[Petition of Haimona Te Aoterangi, and 167 others : presented to the House of Representatives on 18th August, 1874. Māori Version.]

[ko te tohutoro i roto i te reo Pākehā]

He Pitihana inoi tenei na matou katoa e mau ake nei o matou ingoa i te mutunga ake o tenei Pitihana, ki nga tangata katoa o te Paremete kia whakamanaia mai tenei tono a matou, kia rapua mai tetahi ture e Te Runanga o te Paremete, e te Kawanatanga hoki mo tenei hanga kino mo te waipiro, e patu nei i a matou, kia mutu ai nga tangata Maori te kai waipiro, notemea ko te putake tenei o a matou mate e mate nei matou te iwi Maori.

Ko nga mate tenei, ko te whakarawakore i a matou, ko te kore kaore e whanau pai ana o matou uri i te nui o te kai waipiro o te taone o te wahine, ka waiho hei mate mo te tamaiti. Ko te whakapohehe tetahi i nga whakaaro o te tangata, a ka tuhi pohehe ki nga pukapuka whai ritenga, ka waiho tena hei mate. Me te whakakuare o te waipiro i nga tangata whakaaro nui o tenei iwi o te Maori.

page 2

Tetahi, ko te putake tenei o etahi o nga mate uruta e pa nei ki te tangata Maori, na te waipiro i taki mai. Me etahi e pa ana ki a matou, he taka i runga i te hoiho, he mate ki te wai; na te haurangi ano enei mate i taki mai. Me te tahuri hoki ki nga wahine a nga tangata, mahi ai i tetahi tinihanga; ko taua kai ano ki te taki mai i tena mate. Me etahi o nga take whawhai a te tangata raua ko tetahi tangata, na te waipiro ano i taki mai. Me te tini noa atu o era mate e pa ana ki a matou ki te iwi Maori, na taua kai ano i taki mai. Koia matou i tono ai kia rapua mai tetahi ture kaha rawa ki te arai i tenei kai kino rawa atu, kia kore i te tangata Maori; engari kia waiho ma te takuta anake e ki kia kai te tangata i te waipiro, hei take rongoa e ora ai taua tangata, aua tangata ranei, e pai ana tena. Heoi ano, kia mana mai tenei tono i nga mema katoa o te Whare.

Na matou katoa i mau ki a Te Pokiha. E hoa, ka tukua atu e matou tenei Pitihana ki a koe mau e tono kia tu tenei Pitihana hei ture, kia mutu te tangata Maori te kai waipiro.

Ki te mea he aroha tou ki a matou ki te iwi Maori, me whakakore atu tenei rewiatana kino te waipiro, i maua mai nei e koutou ki tenei motu hei patu i a matou, me o matou whenua, me o matou uri hoki. Heoi, e hoa kia maia; e ora ana te Atua hei titiro i nga mahi pai, hei titiro i nga tangata pai, aroha, ki nga rawakore me nga kuare o te ao.

Heoi ra e Ta, mahia atu tenei. Kia ora tonu koe mo to kaha ki te hapai i te kupu whakahe mo taua nakahi nui, mo te waipiro, i nga tau ka taha ake nei.

Heoi ano ra, na o hoa aroha i roto i te pouritanga mo tenei mate.

                                                   Haimona Te Aooterangi,
                                                And 167 others.