He Pukapuka Inoi atu tenei na matou, ki te Runanga Nui o Niu Tireni.

Te take i tuhituhi atu ai matou he nui no tenei raruraru e takoto ake nei, tetehi take he kore whakarongo mai o nga Minita o te Kawanatanga ki a matou pukapuka tono atu ki a ratou ki a tirohia mai to matou mate.

Na konei ka ahu atu ta matou pukapuka Petihana ki te Runanga e noho nei i te Paremata i Moroati Tiriti.

Kua rongo katoa koutou ki nga korero mo Rangitikei, mo te hokinga mai o Ngatiapa ki tenei taha ki waenganui o Rangitikei raua ko Manawatu, he oti whakangawaritia atu e tetahi taha o Ngatiraukawa ko tetahi taha pakeke tonu. Whakawakia ana e te Kooti whakawa whenua, whaka- taua ana e te Kooti ko te awa o Manawatu te rohe.

Kia whakamaramatia atu e matou nga take o tenei raruraru e korerotia nei mo Horowenua. No te kitenga o Ngatiapa kua riro atu tera taha o Manawatu haere atu ki Rangitikei i a ia i a Kawana Hunia, katahi ka peke mai ki tenei taha ki Horowhenua, te taenga tuatahitanga mai o Ngatiapa i a Aperira, 1870, haere mai ano ko nga pu me nga paura, me nga mata na te Kawanatanga katoa enei pu. I tuhituhia atu ano ta matou pukapuka ki a te Makarini i taua tau 1870, tenei ano te kape o taua pukapuka, ko nga kupu o taua pukapuka he tuhituhi mai ki te Minita o te taha Maori kia tikina atu ana pu a te Kawanatanga kahore i whakarangona mai ta matou pukapuka e te Minita o te taha Maori. Heoi ano mahia ana e nga iwi Maori whakahokia atu ana a Hunia ki Rangitikei. No te nei tau 1871, ko Hurae te marama, ka hoki mai ano a Kawana Hunia raua ko Meiha Keepa me o raua tangata me nga pu a te Kawanatanga ki Horowhenua, hohoro tonu ta raua pana atu i nga tamariki a te Whatanui ka wha tekau nei nga tau e noho ana i reira. Tahuna ana nga whare tawhito o mua i te oranga ai o te Whatanui me nga tangata ano e noho ana i roto to ia ana ki waho te wahine a te Watene te Kaharunga patua ana e te Paki awhekaihe, ki te raparapa o te pu no te hoinga i roto i te whare, ko nga ingoa enei o nga tangata i totoia poakatia nei e Hunia ratou ko ona tangata: Watene Kaharunga, ko tana tamaiti kua kaumatuatia, ko te Wahine a te Watene ko te Kiritiaho, Tirotiro, te Tahuri me tana wahine me Hariata me a raua tamariki. Heoi pa ana te Mamae ki a Ngatiraukawa katoa, ki a Ngatiawa, ki a Ngatitoa tahuri katoa ana aua iwi ki te mahi i a ratou pu tawhito hei tiaki i a ratou. Kahore hoki enei iwi e pai ki te whakaheke toto, na konei ka manawanui ai i roto i enei tau puta ana te whakaaro o Ngatiraukawa kia tuhituhi pukapuka mai ki nga Minita o te taha Maori kihai i whakamana mai. Tae ana mai hoki etahi o nga rangatira o Ngatiraukawa i roto i nga ra o Hurae, 1871, he tono kia haere atu a te Makarini ki Horowhenua ki te whakamutu i taua raruraru kihai i haere, no muri ka hoki mai ano etahi o Ngatiraukawa he ki atu kia a te Makarini kia whakahokia atu nga hoia o te Kawanatanga ara a Meiha Keepa raua ko Hunia utua mai ana e te Minita o te taha Maori me hoki a Kawana Hunia raua ko Te Keepa ki Rangitikei, ki Whanganui, me neke mai hoki a te Watene ma, ara nga tangata tawhito o Horowhenua, ki Otaki.

Hoki ana a Kawana Hunia raua ko te Keepa ki Rangitikei ki Whanganui, heoi kahore a Ngatiraukawa i pai kia mahuetia e te Watene tona kainga a Horowhenua he tangata whenua hoki ia no reira kei reira ana whare kei reira ana mahinga kai. Kua rongo matou inaianei kei te hoki mai a Meiha Keepa raua ko Hunia me o raua tangata me nga pu ano a te Kawanatanga ki te pana i a te Watene ki te tango i tona whenua i Horowenua. Kua kite matou inaianei he henui rawa ki reira mo tenei motu ki te puta he whawhai nui. Kaua etahi o koutou e whakaaro, he whawhai na te Maori ki a ratou whakamaori ano e pai ana, kaore, kei te titiro mai etahi iwi atu kei te mohio katoa nga iwi he whenua tuturu no Ngatiraukawa a reira me te mohio hoki na te Kawanatanga a Ngatiapa i whakawhiwhi ki te pu, ma konei ka nui haere tenei he. Kua pa te pouri ki etahi o matou kua mahara hoki kahore te Kawanatanga e aroha mai ana e awhi ana i nga tangata rangimarie. Ko tenei iwi ko Ngatiraukawa ka nui nga tau e noho ana i runga i te rangimarie e whakamanawanui ana i nga raruraru o tenei motu; mau tonu te karakia te kura me te aroha ki a te Kuini me te taiapo tonu i nga ture o te Kuini, tae noa ki tenei tau. Ko a matou pukapuka tono ki te Kawanatanga kihai hoki i wakarangona.

Na konei matou ka inoi atu nei ki to koutou Whare Runanga kia aroha mai ki a matou kia tikina kia kohia mai nga pu me nga paura a te Kawanatanga i a Ngatiapa, i a Muaupoko, i a Rangitane, i a Whanganui, me e tehi atu iwi; kia whakahokia atu hoki aua tangata a Kawana Hunia raua ko te Keepa ki o raua kaioga tuturu ake ki Rangitikei ki Whanganui kia ata noho pai ai matou ko matou hoa Pakeha i runga i te rangimarie. Heoi [unclear: auo].