Ki te Runanga e noho nei ki te Paremata ki Poneke.
E hoa ma tena koutou. Kia rongo mai koutou kotahi to wahine no Waikato kei konei e noho ana ko te taima i haere mai ai ia no te taima e pai ana te haere o uga ritenga o tenei motu o Niu Tirani ara ko te taima i maranga ai te pakanga ki Waikato kua roa noa atu ona tau ki Heretaunga nei noho ai.
No muri i a ia ka maranga te pakanga ki Waikato mate ana taua iwi i muri ia i a e noho nei ki Heretaunga nei. Tae noa ki te rima ona tau katahi ia ka hoki ana mahara ki runga ki te matenga o tana iwi katahi ka titiro ia ki te ritenga mo te mate o ona whenua ina hoki kua mate ana whanaunga nga mea i mahue atu i a ia ki runga i ana whenua.
Na e tono ana matou ki te Runanga e noho ana i te Paremata kia tirohia mai te mate o tenei wahine no te mea kei te noho mate taua wahine i a ia e noho nei me ana tamariki.
Na ki te tuhia atu e matou nga ingoa o aua whenua ma koutou e titiro mehemea ka mohio i a Koutou kei runga te patu a te Kawana i aua whenua me whakaatu ki a matou.
Mehemea kahore te patu a te Kawana i tau ki runga i aua whenua kia marama ta koutou whakaatu mai kia marama ai ta matou whakaatu ki taua wahine.
Ko nga ingoa tenei o nga kainga o taua wahine e mau nei i raro nei:
Ko Kahikawaka Ko te Kumete Ko Manga Pakiaka Ko te Uhi Ko Taokeno Ko Mangaharakeke Ko Hoote Ko Puketawai Ko Rotokauri Ko Kaiaia Ko te Hiihii Ko te Puke Ko te Karamu Ko Wharepaka Ko te Puta o Kaiamaru Ko Whakatau Ko Ohote Ko te Tango.
Ko enei kainga kei waenganui o Waipa raua ko Waikato e tata ana ki Ngaruawahia.
Heoi ano na matou, na te Komiti Maori katoa:
Na Nopera Kuikainga,
Na Paora Ropiha.
Na Heta Hungahunga.
Na Henare Matua.