He pukapuka aroha na Ngapuhi kia Kawana Kerei.

Tena koe, tena koe, e to matou hoa aroha, tenei te pouri te ngau kino nei i roto i o matou ngakau, tenei te whakamorikarika nei o matou ngakau ki nga rongo kohuru o Taranaki, ara, ki nga Hoia i kohurutia nei e Ngatiruanui. Kahore hoki he take mo tenei mahi morikarika. E hoa e Te Kawana ko au whakaaro ki enei tangata Maori, he whakaaro aroha, ko a ratou whakaaro mai ki a koe, he whakaaro kohuru, E Kara e Kawana peheatia te tikanga mo tenei iwi kohuru, ki a koe te whakaaro, kahore i a matou, heoi ano ta Ngapuhi he whakawhirinaki ki runga ki te Kawanatanga i runga i te whakakotahitanga o te whakaaro. E mea ana matou ko te taki mai o enei kohuru kei ta ratou mahi kingi e. ahuareka noa mai ana a ratou korero, oti he ngutu kau, ko nga whakaaro o te ngakau he whakaaro kohuru.

Heoi ano a matou kupu atu ki a koe e Kawana, tirohia mai e koe a matou ingoa ka tuhia nei e matou ki tenei pukapuka, he tohu aroha atu na matou ki a koe, he morikarika no matou ki enei mahi kohuru e mahia mai na.

Heoi ano, e Kara e Te Kawana, tenei au ka whakaurunga ki runga ki toku moenga.

Ko o matou ingoa katoa enei—Hoiano, na o Tamariki Aroha.