Kia Petetone,—
E hoa, tena koe. Kia rongo koe; he nui te tangata i huihui ki te tatari ki a koe i te Hatarei ki Pawakairo. Hiahia ana matou kia rongo i o korero, kia korero atu hoki matou i a matou korero, kia rongo koe. No to korenga e tae mai, he pouri anake matou. Heoti, whai atu nei ta matou pukapuka i a koe. E hoa, kia kaha koe te kimi i te take o te whawai a te Kawana, e whawai mai ra ki Waikato. Ko te whawai ka rongo matou, ko te take kaore e mohiotia atu. Ko te Pakeha kei te ki mai kia matou, He kotikoti, he kohuru te take; ko te taha Maori kaore ano matou i ronge ki aua kotikoti, kohuru. Tenei ia ta matou i rongo ai, ko te whakahaunga a Rewi kia riri i muri iho i te maunga o Aporo ki te whare herehere. Ka karanga a Rewi i reira kia riri. Ka whakahengia e Matutaera, e Tamehana, e Te Paea, e nga rangatira o Waikato. No te kahanga o te whakahe, ka whakamutua ta Rewi, haere mai ana ki Taupo ki te tangihanga mo Te Heuheu. No te hokinga atu, ka tutaki ki te huarahi i te rongo o te pananga mai o nga Maori i o ratou wahi, i te whitinga mai hoki o nga hoia i Mangatawiri, o te hinganga o te Huirama. No te hoki mai o ta matou karere i tono atu ai ki te whakarongo i te riri a Waikato, ka tutaki ki te huarahi, katahi ano ka haere atu ki Meremere a Rewi tonu me tona iwi hoki, me Ngatimaniapoto. Ko te huihui o Taati Te Waru raua ko Porokoru Titipa i haere atu ai, ehara i te mea pokanoa, he mea tone mai na Mohi kia whakatakina atu ia i muri iho i tona pananga mai e te Kawana. Ko te panapananga o te Kohi ma, o nga pakeha katoa, na Rewi tonu i karanga kia Ngatimaniapoto kia panapana ia. Ko te timatanga tena o te whakahe o Waikato i a Rewi. Na ko te tunga atu o te Huirama ma ki te Koheroa, no te kitenga atu ka whiti mai nga hoia i Mangatawiri, e hara mai ana ki te riri kia Waikato, no kona i tu atu ai ki te karo i tona rakau.
Ina tenei rongo o matou ki te Pakeha, e kohurutia ana a te Kawana e Rewi i tona haerenga ki roto ki Waikato. Kei te whakaparautia e matou, ina hoki rangona katoatia e matou ki nga Maori nga korero o te taenga mai o te Kawana ki Ngaruawahia, o te kitenga o te Kawana i te urupa o Potatau, te tangihanga o te Paea, te whainga atu o Matutaera kia kite i a te Kawana ki Ngaruawahia. A he aha ra te kohuru a Rewi mo te Kawana i kore ai e korerotia kia matou?
He hoatu ia tenei i nga mea i rongo ai matou kia kimihia iho e koe te totikatanga, te henga ranei, ka whakaatu mai ai kia rongo atu matou, wakaatu rawa mai i nga kupu nana i whakahe.
Heoti ano.
Na o hoa, Na Renata Tamakihikurangi,
Na Karaitiana Takamoana,
Na Te Wirihana Toatoa.