Kia Noa, kia Karaitiana, kia Renata, kia Paora, kia Tareha, ara, kia koutou katoa.
E Tai ma Te Iwi,—

Tena koutou. He kupu atu tenei naku kia koutou, kia tupato kia koutou kei poto, kei penei me nga rangatira o Waikato, kua poto nei ki te whare herehere i a te Kawana; no te mea ka peneitia tonutia nga tangata o te motu nei. Ko etahi, ka whiua; ko etahi, ka hopukia ki te whare herehere. Kia mohio nga tangata o kona ki nga tikanga a te Kawana,—nga tangata o Heretaunga, o Wairarapa, Otaki, o era atu wahi e noho kuware nei. Heoi ano tena kupu. Kia rongo mai koutou. I te 9 o nga ra o Hurae ka tae mai te reta a te Kawana ki nga tangata o Manukau. Ko te kupu tenei, kia whakatika atu ratou ki Waikato, ki tera taha o Mangatawhiri. Whakatika ana ratou, waiho ana o ratou ake pihi. 10 o Hurae kua tae nga hoia ki runga i aua pihi, ka mahue a Mangere, a Pukaki, a Patumahoe, a te Kirikiri. 11 o Hurae ka tae nga hoia ki Pokeno, ki Tuakau. Ko nga taonga o enei wahi pau katoa atu i te ahi. Ko etahi o nga tangata i peipei atu i runga i aua wahi. 12 o Hurae, ka whiti ki tenei taha o Mangatawhiri. 13 o Hurae, katahi a Waikato ka tae atu ki te Koheroa. 17 o Hurae, ko te whawhaitanga. 17 o Hurae, ka whawhai ki te rori. Kotahi tonu to ra i oho ai. 22 o Hurae, ka whawhai ki te Kirikiri; no reira te pa horo. Kia rongo mai koutou; ko te taiepa tenei o to Motu nei. Ekore e tukua kia wahia. Ki te mea ka pakaru, ka taea nga taonga katoa o te whare. Ekore e tukua mai te waipuke kia huri mai. E ta ma, ehara ianei inaianei te whakamau o te Kawana. I timata mai i te haere oku ki Hauraki. Ahakoa haere noa ia ki Taranaki, ko tona whakaaro e mau tonu ana ki Waikato.