Proceedings of of the Kohimarama Conference, Comprising Nos. 13 to 18 of the "Maori Messenger."
Na Parawhau. No. 2
Na Parawhau. No. 2.
Kohimarama,
Hurae 14, 1860.
E pa, e te Kawana,—
Tena koe! Tenei toku whakaaro. Kia rongo koe! Ko te take o te he ko te whakatu kingi mo te tangata Maori; tetahi, he whawhai; tetahi, he whenua—ta Wiremu Kingi Te Rangitake, tana take; ko tetahi he, he uru atu no tetahi iwi ki roto i te whawhai a Wiremu Kingi Te Rangitake; tetahi he, he uru atu no tetahi iwi ki roto ki te Kingi Maori. Ka rua enei take: tetahi, he whakararuraru enei take, he pokanoa tenei, he tahae i te aroha o te Atua, a, i te aroha o te Kuini, ki nga tangata o Niu Tireni; he tahae tenei i runga i te rangimarie, i te maru mai o te Kuini ki runga i nga tangata o Niu Tirani. He takahi tenei i te atawhai o te Kuini ki nga Pakeha kua tupu nei ki Niu Tireni, me nga tangata Maori kua tupu ake nei i te maru atawhai o te Atua; tetahi, i te maru atawhai o te Kuini ki runga i nga tangata Maori i nga Pakeha o Niu Tireni.
E pa, e te Kawana, tena koe! Tena koe! Ki te kaha te tangata ki te whana i te ture, ki te takahi ranei i te ture, e mea ana te ture kia mate ia, mate rawa. Heoi tenei reta.
Naku, na tou tamaiti aroha,
Na Te Manihera Te Iwitahi,
Te Parawhau, Whangarei.
Ki a te Kawana Koa Paraone.