Nga Mahi A Te Hui O Te Hahi Maori O Te Atirikonatanga o Te Waimate, I Te Pihopatanga O Akarana. Huihui Ki Peria, Oruru, I A Aperira 4, 6, 1891.
Ko Enei Nga Tikanga O Era Atu Hui E Mau Tonu Ana
Ko Enei Nga Tikanga O Era Atu Hui E Mau Tonu Ana.
I.
Mo Nga Kura Ratapu mo nga Tamariki.
He whakahau tenei ki nga wahi katoa o tenei Atirikonatanga mo nga Kura tamariki i nga Ratapu kia tu tonu.
II.
Kaua nga Whare-Karakia e waiho hei Whare-kura ra noa.
Ki te whakaaro o tenei Hui, ekore e tika kia waiho nga Whare-karakia hei whare-kura i nga ra noa, engari me whakamotuhake mo te Karakia anake; a me whakatu ano nga whare-kura. Ehara tenei tikanga i te pei i nga tamariki i nga kura, erangi he mea kia motu kē te Wharekarakia, kia motu kē te whare-kura.
III.
Mo nga moni haerere a nga Mangai Reimana.
Kia whakāro nga tangata o nga Pariha ki o ratou Mangai Reimana, ki te whakaea i nga moni e pau ana i a ratou e haerēre ana ki nga Hui. Ko aua moni me tango i roto i nga Kohikohi, me kohi ra waho ranei.
IV.
Mo nga turoro kia Whakaaturia ki te Minita.
He kupu tenei ki nga tangata katoa o ia Pariha, o ia Pariha, mo nga turoro kia whakāturia mai ki te minita; kia kaua e waiho kia takoto noa iho taea noatia to ratou matenga, ka korerotia ki te minita. He tino mea pouri tenei.
V.
Kia haerere nga Minita ki te tirotiro i nga kura.
Kia tae tonu nga minita ki nga kura tamariki i nga ra noa, ki te whakaako i nga tikanga o te Whakapono.
VI.
Kia whakamutua te mahi Maori ki runga ki nga Tamariki.
Kaua nga tikanga Maori ki runga i nga tamariki kohunga- hunga i mua i to ratou iriiringa, hei muri, ka kawea mai kia iriiria. He tino mahi hē tena; me mutu rawa taua tikanga Maori i roto i nga tangata Karaitiana.
VII.
He mahi ma nga Hahiwatena.
Ma nga Hahiwatena o nga kainga e whakaatu ki te Minita ina tae atu, i nga tamariki mo te iriiri.
VIII.
He Rehita iriiriringa, marenatanga, tanumanga.
Kia tu nga tino Whare-karakia i nga Rehita iriiringa, marenatanga, tanumanga.
IX.
Nga whenua mo te Hahi.
Kia hohoro te whakamotuhake i nga whenua mo te Hahi, karauna karaati rawa, ka tuku ai ki nga kaitiaki ( trustees).
X.
Nga kohikohi o nga Whare-karakia.
Kaua nga kohikohi o nga Wharekarakia e meinga hei hoko kai mo nga Hui o te Hahi, erangi me ra waho ho kohikohi mo ena mea.
XI.
Kai titiro moni.
Ma te Minita me tetahi tangata kē, ehara nei i te Hahiwatena, e titiro nga pukapuka kohikohi, e tatau hoki i nga moni o nga Pariha.
XII.
Tikanga mo te nehu tupapaku.
Kaua te Kaikarakia e pokanoa te nehu i te tupapaku i te mea tata ana te minita. Kia whakaae ra ano ia, katahi te Kaikarakia ka nehu.
XIII.
Utu mo te Iriiri.
Kaua te minita e tono utu mo te iriiri; erangi ki te hiahia nga mātua kia homai noa mai he mea ma te minita, e pai ana kia tangohia e ia.
XIV.
Nga tikanga e whakatakotoria ana e te Hui.
Kia whakamana rawatia nga tikanga e whakatakotoria ana e te Hui o te Hahi.
XV.
Nga mema noho atu.
Ki te noho atu tetahi mema o te Hui, kia tae rawa ki te Upoko he reta whakaatu i te take i noho atu ai.
XVI.
Nga Tohunga Maori.
Kia whakakorea rawatia te haere ki nga tohunga Maori.
XVII.
Nga pire moni.
Kia marama rawa nga pire moni o nga Pariha ka ahei kia tangohia; ki te hē te pire ka whakahokia kia whakatikaia mai.
XVIII.
Rawiri ma nga Kaikarakia.
Me tuku noa te Rawiri ma nga Kaikarakia tuturu o nga Pariha, ma nga Wharekarakia e hoatu.
XIX.
Kia kaua rawa te Hahi Maori e wehea mai i te Hahi Matua, ara i te Hahi o Ingarangi.
XX.
Kia whakatuturutia nga tau e tu ai te mangai Reimana ka ahei ai kia pooti ano, hei te toru o nga tau.
XXI.
Kia whakaaro te Hahi Maori ki te whakatakoto i nga moni toenga a nga Pariha hei oranga mo ratou.
XXII.
Kia kaua e kahore he moni kawe i te Rongo Pai i nga pire moni o nga takiwa, ahakoa nui, iti ranei.
XXIV.
He mea tika hei Matuaatua te pāpā me te whaea, a ma raua e whiriwhiri he tokotoru mo raua.
He tohutohu mo nga whenua e tukua ana mo te Hahi.
1. | Me matua ruri. |
2. | Ka oti te ruri me tuku ki te Kooti whakawa whenua. |
3. | Ka puta i te Kooti, me tuku ki nga Kaitiaki ( trustees). Kei nga kaituku te tikanga mo nga tangata ma ratou e tiaki, erangi kia uru te Pihopa te Atirikona ranei ki roto i nga Kaitiaki. |
4. | Ma te Pihopa e rapu tetahi wahi o te moni hei utu mo te ruritanga, me te whakawakanga o nga whenua o tukua ana mo te Hahi. Me whakarite ta te Pihopa moni ki te pai, ki te nui ranei o te whenua. |
He inoi mo te Hui o te Hahi Maori.
E te Atua Kaha rawa, kua oti te whakakotahi e koe tau hunga whiriwhiri katoa hei tinana mo tau Tama mo to matou Ariki mo Ihu Karaiti; ki te huihui hoki ou tangata ki tetahi wāhi i runga i tou ingoa, ko reira ano koe; kia anga mai to whakaaro atawhai ki tenei wahi o te Hahi, manaakitia mai hoki matou, te Pihopa, me nga Minita, me nga Mangai o te iwi kua mine mai nei ki te rapu tikanga. Kia riro mai i a matou nga taonga maha a tou Wairua Tapu, ara, te mahara, te mohio, te kaha, te aroha me te ata whakaaro; kia whai tonu ai matou i roto i a matou mahi katoa, ko koe kia whakakororiatia, ko te pai o to iwi kia kake, ko tou rangatiratanga kia whakanuia. Kei meatia tetahi mea e matou i runga i te tikanga totohe, i te whakapehapeha, i te mataku ranei i te tangata. Kei hē hoki a matou mahi i te whakaaro poka noa ake, i te hianga ranei a te tangata: engari, kia ata whakatakotoria nga tikanga katoa e tupu pai ai to Hahi i roto i o matou; kia mahia ai o matou katoa nga mahi pai kua rite mai nei i a koe hei mahinga ma matou; kia whakakotahitia ai matou katoa i roto i te whakapono, i te aroha; kia rite tahi ai hoki o matou whakaaro, me o matou mangai, tewhakakororia i a koe; ko Ihu Karaiti hoki to matou Ariki. Amine.